Vetëm 4 ankesa ​për rritjen e çmimeve

Ngritja e çmimeve të jashtëzakonshme të rrymës dhe e produkteve të tjera bazike ka vështirësuar jetën e qytetarëve, për të cilët shteti ende nuk ka bërë sa duhet për mbrojtjen e tyre.
Kështu tha Dardan Abazi, hulumtues i lartë në Instituti për Politika Zhvillimore (INDEP) në tryezën e diskutimit “Ngritja e çmimeve në treg dhe mbrojtja e konsumatorit”.
Madje, Abazi theksoi se ankesat e konsumatorëve janë të shumta për rritje të çmimeve të pa paralajmëruar nga tregtarët, siç u shpreh ai në disa raste ka edhe dyshime për këto shtrenjtime për marrëveshje kartel.
Çuditërisht numri i ankesave nga konsumatorët që janë adresuar në Ministri të Industrisë, Ndërmarrësisë dhe Tregtisë është tejet i ulët.
Sipas kësaj ministrie, nga janari deri në shtator janë paraqitur vetëm 19 ankesa, derisa nga shtatori e deri tash kur janë rritë çmimet janë jo më shumë se 4 ankesa nga konsumatorët.
Udhëheqësi i Departamentit të Tregtisë, Zef Dedaj, tha se qytetarët duket se janë të vetëdijshëm që këto rritje të çmimeve kanë ardhur si pasojë e importit të mallrave.
Dedaj në këtë tryezë theksoi se është evidente se ka rritje të çmimeve, të cilën ngritje ai e quajti si shqetësuese, por sipas tij kjo po diktohet nga importi i mallrave nga jashtë.
“Nëse ne po importojmë mallra kjo nënkupton që ne po importojmë edhe rritje të çmimeve. Fatmirësisht për rrymën nuk ka rritje. Sa i përket rritjes së çmimeve të karburanteve dhe të tjera kjo ka ndodhur dhe është vërtetuar nga ASK. Gjithsesi se është shqetësuese rritje e çmimeve për produkteve bazike, që bëjnë pjesë buka, vaj ushqimor, mishi dhe të tjerët”, tha ai.
Kryetari i Odës Ekonomike të Kosovës, Berat Rukiqi, tha se kriza energjetike dhe rritja e çmimeve të rrymës ka prekur më së shumti bizneset.
Rukiqi inkurajoi bizneset për rritjen e pagave për punëtorët, derisa theksoi se disa kompani veç janë duke bërë një gjë të tillë.