Vjet 49 euro, sivjet 242 euro megavati

KEDS ka deklaruar se kriza energjetike globale ka ndikuar dukshëm në rritjen e çmimeve të importit të energjisë.
Sipas tyre dallimi është shumë i madh.
“Dallimi është tejet i madh, marrë parasysh që vitin e kaluar megavati është blerë 49 euro , kurse këtë vit 242 euro”, thuhet në një postim të KEDS-it në “Facebook”.
Lidhur më këtë sipas tyre kursimi i energjisë elektrike në këtë fazë që po e kalojmë, është më se i domosdoshëm.
“Prandaj, #krejtbashkë nëse kursejmë mund ta lehtësojmë ndikimin e krizës në Kosovë si dhe impaktin që do ta ketë në tarifa”, thuhet në njoftim.

Në ndërkohë, sot Ministrja e Ekonomisë, Artane Rizvanolle u zotua se si qeveri kanë prioritet, adresimin e çështjes së ngrohjes, ndërsa shtoi se qytetarët duhet të kursejnë energjinë aq sa munden.
“Jemi duke punuar politika nga fillimi sa i përket çështjes së energjisë. Rreth 30-40 përqind e energjisë shkon për ngrohje në Kosovën. Adresimi i çështjes së ngrohjes është tepër me rëndësi për qeverinë tonë. Nuk duhet pasur iluzione se sisteme të tilla të ngrohje do të mbulojnë gjithë vendin. Ne si qeveri kemi disa projekte në vijim. Në ‘Termokos’ parashihen investime në rehabilitimim dhe zgjerimin e rrjetit. Ne kemi inauguruar ngrohtoren në Gjakovë. Pritet që të jetë e qëndrueshme financiarisht. Funksionimi i ngrohtores do të ketë një mundësi e mirë për ne si partner”, ka thënë ajo. Ajo ka sqaruar edhe deklaratën për shpenzimin e energjisë. “Është me rëndësi që qytetarët e Kosovës, në Evropë dhe Botë është duke ndodhur një krizë energjetike. Çmimet e importit janë rritur pesëfishtë në dallim me vitin e kaluar. Është një gjendje e jashtëzakonshme ku secili duhet të bëjë dhe qytetarët duhet të kursejnë energjinë aq sa munden. Qytetarët duhet të kuptojnë që mos kursimi i energjisë dhe sa më shumë shpenzojmë energji duhet të importojmë më shumë. Dhe mund të ketë edhe rritje të tarifave në prill”, ka shtuar ajo. /21Media

Back to top button