Zelensky e fton Trumpin në vijën e parë të frontit

Trupave ukrainase po u mbarojnë municionet pasi mbështetja jetike e Shteteve të Bashkuara të Amerikës po mbahet nga mbështetësit e ish-presidentit Donald Trump në Kongres.

Presidenti i Ukrainës, Volodymyr Zelensky, është shprehur i gatshëm për një vizitë në vijën e parë bashkë me Trumpin.

“Nëse z.Trump vjen, unë jam gati të shkoj me të në vijën e parë. Çfarë do të thotë lufta e vërtetë, jo Instagrami, lufta e vërtetë”, ka thënë presidenti ukrainas.

Kështu është shprehur ai derisa ka bërë apel urgjent për më shumë armë në mënyrë që të shmanget “situata katastrofike” në Evropë.

“Një deficit artificial i armëve do ta ndihmonte vetëm Rusinë”, ka thënë Zelensky në një konferencë ndërkombëtare në Gjermani.

Zëvendëspresidentja e SHBA-së, Kamala Harris ka përsëritur më parë garancinë se do ta mbështesin Kievin.
“Shtetet e Bashkuara nuk mund të luajnë lojëra politike mbi ndihmën ushtarake”, ka thënë ajo në konferencën e përbashkët me Zelenskyn në Konferencën e Sigurisë në Mynih.

Mbledhja e liderëve botërorë dhe zyrtarëve të lartë të mbrojtjes vjen një javë para dyvjetorit të pushtimit të plotë të Ukrainës nga Rusia.