Zyrtare/ Lionel Messi te Inter Miami deri në vitin 2025

David Beckham mbërrin në momentin për të cilin ka punuar ndoshta prej vitesh. Lionel Messi, një nga lojtarët më të mirë të historisë së futbollit botëror është pjesë e skuadrës që ish-mesfushori e themeloi.

Inter Miami zyrtarizon blerjen e fituesit të 7 Topave të Artë. Kampioni i botës ka nënshkruar deri në vitin 2025 dhe pritet që t’i japë një zhvillim të panjohur më parë në Amerikën e Veriut sportit të futbollit.

Pasi ktheu mbrapsht një ofertë të paimagjinueshme nga Al Hilal ku iu premtuan 400 milionë në sezon dhe pasi mbylli gjithashtu historinë e dështuar 2-vjeçare me PSG, argjentinasi zgjodhi Florida-n dhe diellin e shtetit të Amerikës Veriore për të vijuar dhe ndoshta për të mbyllur karrierën pa shumë presion dhe i relaksuar pas një epoke të artë që kulmoi me Kupën e Botës 2022.

“Jam shumë i emocionuar që do të nis një kapitull të ri në SHBA me fanellën e Inter Miami. Kjo është një mundësi fatastike dhe bashkë do të vijojmë punën për të ndërtuar këtë projekt shumë të bukur. Jam i paduruar për të filluar nga puna dhe për të dhënë një ndihmë të madhe këtu”, tha Messi.

Messi ka fituar 4 trofe të Champions League dhe ka shënuar 672 gola në 778 ndeshje me Barcelonën ka nënshkruar një kontratë nga e cila do të përfitojë 60 milionë dollarë në sezon ku përfshihen edhe financimet që do të bëjnë kompanitë Adidas e Apple, ku kjo e fundit u bë edhe sponsori më i fuqishëm për mbërritjen e “pleshtit” në SHBA.

NDIQNI PJESËT MË INTERESANTE TË PROGRAMIT TË RTV21, DUKE BËRË LIKE KËTË FAQE – 21 MEDIA