Studentët “jo” dialogut me Ramën, shtojnë kërkesën: Shfuqizo Ligjin e Arsimit të Lartë!

Studentët i janë përgjigjur me “jo dialog” dhe “plotëso kërkesat” apelit të kreut të qeverisë

Studentët shqiptarë vazhdojnë të refuzojnë ofertat e vazhdueshme të kryeministrit Rama për dialog në lidhje me 8 pikat e tyre.

Të mbledhur të shumtë në numër para parlamentit ku zhvillohet seanca e radhës plenare, ata i janë përgjigjur me thirrje në kor “jo dialog” dhe “plotëso kërkesat”, apelit të kreut të qeverisë që studentët të shkonin madje edhe brenda në sallën e kuvendit dhe të diskutonin në sy të publikut kërkesat e tyre.

Një pjesë e studentëve tani kanë shtuar si kërkesë të tyre shfuqizimin e Ligjit të Arsimit të Lartë!

Qindra forca rendi janë vendosur në hyrje të parlamentit për të siguruar rend e qetësi në protestën e studenteve, e cila është në ditën e 10-të.

Një numër i konsiderueshëm studentësh kanë shkuar me autobus edhe nga rrethet si Elbasani, Durrësi dhe Shkodra.

Bashkë me ta në proteste janë edhe nxënës të shkollave të mesme të Tiranës, raporton vizionplus.