​Mehaj: Forca e Sigurisë së Kosovës është duke e rritur profesionalizmin

Në konferencën “FSK dhe Partnerët”, ministri i Mbrojtjes, Armend Mehaj tha se Forca e Sigurisë së Kosovës është duke e rritur profesionalizmin dhe kapacitetet.
“Në vitin 2021, FSK-ja ka marrë pjesë në misionin e parë paqësor, nuk do të jemi vetëm konsumues të sigurisë por edhe ofrues të sigurisë”, tha ai.
Ministri përmendi pjesëmarrjen në Defender Europe 2021 si arritje e madhe e FSK-së.
“Në këtë forum me partnerët do të ritheksoja përkushtimin e Republikës së Kosovës për t’u koordinuar në sfidat e paqes dhe sigurisë, mbështetjen e vazhdueshme dhënë ndaj FSK-së, gjithashtu të avancojmë praktikat në vendin tonë”, tha ai.
Drejtori i NALT-it, gjeneralbrigade Joachim Hoppe tha se ky takim është me kohë pasi që ne po gjejmë prioritetet për vitin e ardhshëm, në veçanti për NALT-in dhe strategjinë 2023- 2025.
“Është mundësi e mirë për të nënvizuar disa nga rolet e NALT-it. NALT-i janë pjesëtarë të NATO-s, jemi për të ndihmuar zhvillimin e mëtejmë të FSK-së. Qëllimi ynë është formësojmë FSK-në që ndihmon paqen dhe sigurinë në bazë të principeve fundamentale, sundimit të ligjit, të drejtave të njeriut, dhe po punojmë me ju në baza ditore për të arritur këto qëllime”, tha ai.
“FSK dhe Partnerët” është konferencë vjetore ndërkombëtare./KP