Tenderi për uniformat e Policisë, hetuesia siguroi dëshmi për mashtrim
Hetuesit policorë të Drejtorisë për Hetimin e Krimeve Ekonomike dhe Korrupsionit (DHKEK), kanë trajtuar dy raste që lidhen me fushën e hetimit nga ana e tyre.
Pas tenderit të hapur nga Policia për furnizim me uniforma të policisë, kishin aplikuar disa operatorë ekonomik. Hetuesit policorë nga DHKEK-u, nën dyshim për përfshirje në veprën penale “keqpërdorimi dhe mashtrimi në prokurim publik”, kanë filluar hetimin që ka zgjatur afër dy muaj. Bazuar në hetimet e kryera, gjegjësisht në të gjeturat gjatë hetimit, ka ardhur deri te dyshimi se tre operatorë ekonomik kanë kryer veprën e lartcekur. Rasti është iniciuar dhe janë siguruar dëshmi që së bashku me kallëzimin penal do të dërgohen në Prokurori.
Hetuesit policorë nga DHKEK-u, kanë pranuar një informatë se në një barnatore në Prishtinë shiten barna pa banderola të Republikës së Kosovës. Policia në bashkëpunim me Inspektoratin Farmaceutik kanë kryer kontroll në këtë barnatore. Pronari i barnatores është shoqëruar në Polici dhe i njëjti është intervistuar. Rasti i iniciuar është trajtuar në koordinim me prokuroren kujdestare dhe me aktvendim nga ana e saj rasti do të vazhdojë në procedurë të rregullt./21Media