Çelaj: Ahmeti po sillet me pronën publike sikur të ishte e tij
“Shpend Ahmeti ka shkelur ligjin për dhënie në shfrytëzim dhe këmbimin e pronës së paluajtshme të komunës , në nenet 5, 7 dhe 8 duke kryer kështu vepër penale për të cilën duhet të jap përgjegjësi”.
Kështu ka thënë sot kryetari i degës së PDK-së në Prishtinë, Lirak Çelaj në një konferencë për medie.
Çelaj tha se kryetari Ahmeti po sillet me pronën publike sikur të ishte e tij, pa e përfillur asnjë procedurë ligjore.
“Ju kemi ftuar për të denoncuar në një farë mënyre një shkelje flagrante që ka bërë kryetari Ahmeti, në komunën e Prishtinës, i cili po sillet me pronën publike sikur të ishte e tij, private, pa përfillur asnjë procedurë që është paraparë me ligj”.tha ai.
Sipas Çelajt, se Ahmeti ka bërë shkelje të nenit të 5 në pikën 1 të saj, sepse nuk ka bërë konkurrencë të hapur publike dhe se ka themeluar me gjithë shokët e tij OJQ-të dhe u ka dhuruar atyre objektet publike.
“Një prej themeluesve të këtyre çerdheve është edhe asamblisti i Vetëvendosjes dhe kjo na bënë të dyshojmë që ata i kanë themeluar këtë duke manipuluar jo vetëm me aktivistët e vet por edhe me prindërit me emocionet e tyre, që nuk është hera e parë që ata manipulojnë me sistemin shkollor, në këtë rast edhe me ata parashkollor dhe ata nuk gjejnë asnjë mjet për të arritur qëllimet e tyre politike”, tha ai.
Çelaj ka deklaruar se nuk dihet se si janë pranuar punëtorët në këto çerdhe dhe se dyshojnë që janë krijuar për të punësuar militantë të Vetëvendosjes.
“Ne nuk e dimë se si janë pranuar punëtorët në këto çerdhe, të ashtuquajtur me bazë dhe komunitet, nuk e dimë se si janë menaxhuar financat në këto çerdhe dhe aq më shume e kemi parasysh që komuna ka participuar në raport me këto çerdhe pra edhe financiarisht edhe ndihma tjera u janë dhënë këtyre çerdheve. Ne dyshojmë që këto janë bërë për të punësuar militant të partisë Vetëvendosje dhe për të manipuluar elektoratin, pra për t’i joshur me gjëra të ndryshme dhe konsiderojmë se këto shkelje duhet vënë para drejtësisë, konsiderojmë që është vepër penale është keqpërdorim i detyrës zyrtare që ka bërë dhe nuk është rasti i parë fatkeqësisht unë besoj që ka edhe raste të tjera”, tha Çelaj.