216,350 euro gjoba për subjektet politike
Paneli Zgjedhor për Ankesa dhe Parashtresa, ka shqyrtuar dhe vendosur sot lidhur me 10 ankesa për thyerjen e heshtjes zgjedhore dhe ditën e zgjedhjeve.
Sipas PZAP-së, ankesat janë paraqitur nga individ, subjekte politike, kandidatë për deputet, organizata, anëtarë të Komisioneve Komunale të Zgjedhjeve, etj.
Prej 10 ankesave të shqyrtuara, Paneli ka vendosur që t’i pranojë si të bazuara 2 ankesa, 1 ankesë e ka refuzuar si të pabazuara, 2 ankesa i ka hedhur si të palejuara, 5 ankesa i ka hedhur si të pasafatshme.
Përkitazi me ankesat e lartcekura, PZAP ndaj subjekteve politike ka shqiptuar gjoba në shumën totale prej 1,200.00 euro, për shkak të mosrespektimit të Kodit të Mirësjelljes.
“Natyra e ankesave të paraqitura kanë qenë thyerja e heshtjes zgjedhore gjatë ditës së votimit, respektivisht shpërndarja e SMS-ve tek qytetaret thirrje për të votuar subjektin e caktuar politik. Subjekteve politike në seancën e sotme iu janë shqiptuar gjoba si në vijim: Ndaj subjektit politik PDK janë shqiptuar gjoba në shumë prej: 600.00 euro; Ndaj subjektit politik LDK janë shqiptuar gjoba në shumë prej: 600.00 euro; Në fund ju informojmë se Paneli sot ka shqyrtuar dhe vendosur të gjitha ankesat dhe apelet e paraqitura nga individ, subjekte politike, kandidatë për deputet, organizata, anëtarë të Komisioneve Komunale të Zgjedhjeve, anëtarë të Këshillave të vendvotimeve, qytetarë, vëzhgues, etj. PZAP për shkak të mosrespektimit të Kodit të Mirësjelljes, nga ana e subjekteve politike, Mbështetësve dhe përkrahësve të tyre, gjatë fushatës së zgjedhjeve dhe thyerjen e heshtjes zgjedhore në ditën e heshtjes zgjedhore, si dhe në ditën e zgjedhjeve, ndaj tyre ka shqiptuar gjoba në shumën totale prej: 216,350.00 euro. Subjekteve politike iu janë shqiptuar gjoba si në vijim: Ndaj subjektit politik PDK janë shqiptuar gjoba në shumë prej: 66,100.00 euro, ndaj subjektit politik AAK janë shqiptuar gjoba në shumë prej: 52,750.00 euro, ndaj subjektit politik LVV janë shqiptuar gjoba në shumë prej: 44,700.00 euro, ndaj subjektit politik LDK janë shqiptuar gjoba në shumë prej: 28,600.00 euro, ndaj subjektit politik NISMA janë shqiptuar gjoba në shumë prej: 22,000.00 euro, ndaj subjektit politik Lista Srpska janë shqiptuar gjoba në shumë prej: 2,200.00 euro”, thuhet në njoftim./21Media