25 yjet që do ta humbasin Botërorin
Botërori 2026 do të sjellë emrat më të mëdhenj të futbollit botëror, por në Shtetet e Bashkuara, Kanada dhe Meksikë do të mungojnë edhe disa prej yjeve më të spikatur të momentit.
Sipas një renditjeje të publikuar nga Score 90, në mesin e 25 lojtarëve më të mirë që nuk do të jenë pjesë e Kupës së Botës gjenden emra si Khvicha Kvaratskhelia, Dominik Szoboszlai, Victor Osimhen, Gianluigi Donnarumma, Alessandro Bastoni, Rodrygo Goes, Sandro Tonali, Robert Lewandowski dhe Jan Oblak.
Arsyeja kryesore e mungesës së shumicës prej tyre është dështimi i përfaqësueseve të tyre për t’u kualifikuar në turneun më të madh të futbollit. Italia, Polonia, Sllovenia, Nigeria, Gjeorgjia, Hungaria dhe Serbia janë vetëm disa nga kombëtaret që nuk arritën të sigurojnë një biletë për Botërorin, duke lënë jashtë skenës më të madhe disa nga futbollistët më cilësorë të dekadës së fundit.
Lista përfshin gjithashtu lojtarë të rinj që po shkëlqejnë në klubet e tyre, si Hugo Ekitike, Dean Huijsen, Estevao Willian dhe Joao Pedro, të cilët do të duhet të presin një tjetër mundësi për të debutuar në Kupën e Botës.
Mungesa e këtyre emrave tregon edhe një herë se talenti individual nuk mjafton gjithmonë për të siguruar pjesëmarrjen në Botëror, pasi fati i lojtarëve lidhet ngushtë me suksesin e kombëtareve të tyre në rrugën e kualifikimeve.
KosovaPress
Dëshiron ta dëgjosh këtë lajm me zë?