7 aktakuza gjatë vitit 2022 ku viktima kanë qenë gazetarët

Prokurori Bashkim Zeqaj ka bërë të ditur se gjatë vitit 2022 janë ngritur 7 aktakuza ndaj të pandehurve ku viktima ka qenë gazetarët.
Zeqaj ka treguar se gjatë vitit të kaluar Prokuroria Themelore në Prishtinë ka pranuar 12 raste të tilla.
“Nëse i referohemi vitit 2022, Prokuroria Themelore në Prishtinë ka pranuar 12 raste, nga të cilat ju njoftojmë se vetëm në vitin 2022 i kemi ngrit 7 aktakuza ndaj të pandehurve ku viktima ka qenë gazetare dhe dy lëndë i kemi të mbyllura me raport për mbyllje të rastit kurse të tjerat janë në proces e sipër nga ana e prokurorëve”, ka treguar Zeqaj për Betimin për Drejtësi.
Gjatë intervistës Prokurori ka përmendur vetëm disa raste të zbuluar nga ana e Prokurorisë.
“Atëherë mund të fokusohem tek rasti Kajtazi të cilin Prokuroria e ka zbulu kryerësin e veprës penale. Në bashkëpunim me policinë kemi bërë kërkesën për caktim të paraburgimit dhe pastaj e kemi ngritë edhe aktakuzën ndaj atij personi. Nëse fokusohemi tek viti 2022, po për të njëjtin Kajtazi ndaj 4 personave, ndaj të cilëve është ngritë aktakuzë për të cilët e kanë kryer veprën penale kanosje ndaj të dëmtuarit Kajtazi. Poashtu, gjatë vitit 2022, me datën 1 tetor, kemi ngritë një aktakuzë ndaj një personi, i cili e ka kanosur gazetarin me një mjet të rrezikshëm, i cili ka qenë duke bërë storie në një treg në Fushë Kosovë dhe pastaj Prokuroria e ka bërë kërkesën për caktimin e paraburgimit ndaj personit që i kemi pas provat mjaftueshme”, ka thënë Zeqaj.

Back to top button