​Presidenti i Komitetit Olimpik të Evropës: Gjithë Evropa sytë te Kosova për shkak të sportit

Presidenti i Komitetit Olimpik të Evropës (EOC), Spyros Capralos dhe sekretari i përgjithshëm, Raffaelo Pagnozi kanë qëndruar për dy ditë në Kosovë ku janë njoftuar me zhvillimin dhe avancimin e sportit në Kosovë, sidomos pasi që Kosova është shpallur fituese për organizimin e Lojërave Mesdhetare në vitin 2030.

Me këtë rast, Presidenti i Komitetit Olimpik të Kosovës, Ismet Krasniqi, ka thënë se Capralos është shprehur shumë i lumtur me punën që ka parë në Kosovë në fushën e sportit dhe se mbështetja e tyre në këtë drejtim është shumë e madhe.

Ndërsa, Presidenti i Komitetit Olimpik të Evropës (EOC), Spyros Capralos, theksoi se ka mbetur i mahnitur nga zhvillimi i sportit në Kosovë dhe buxhetin që po i kushtohet kësaj fushe nga ana e institucioneve të shtetit.

Ai shtoi se e gjithë Evropa ka kthyer sytë te Kosova për të parë se si do të organizohen Lojërat Mesdhetare në vitin 2030.

Gjatë së hënës, i pari i Komitetit Olimpik Evropian është takuar edhe me Kryeministrin e Republikës së Kosovës, Albin Kurti si dhe me ministrin e Ministrisë për Kulturë, Rini dhe Sport, Hajrulla Çekun.