Sinani u bën thirrje ndërkombëtarëve që me urgjencë ta parandalojnë bllokimin e kufijve
Kryetarja e Preshevës, Ardita Sinani ka reagua rps paralajmërimeve se sot Serbia do t’i bllokojë kufijtë me Kosovën.
Ajo u ka bërë thirrje ndërkombëtarëve që të reagojnë.
“Ftojmë me urgjencë ambasadat e SH.B.A.-së, shtetet anëtare të Bashkimit Evropian, dhe bashkësinë ndërkombëtare që të reagojnë dhe të ndërmarrin hapa të menjëhershëm për të parandaluar përshkallëzimin e kësaj situate. Duhet të angazhohemi për të ruajtur paqen dhe stabilitetin në rajon, duke respektuar liritë dhe të drejtat themelore të qytetarëve për lëvizje të lirë dhe jetesë të qetë.”, ka deklaruar Sinani
Më tej Kryetarja e Preshevës thënë se bllokimi i rrugëve do ta vështirësonte jetën e qytetarëve të Preshevës.
“Rrugët janë simbol i lidhjes dhe bashkimit mes njerëzve. Çdo bllokim rruge nuk është vetëm një pengesë fizike, por një mesazh i qartë i imponimit të izolimit dhe distancimit edhe më të madh.
Si Kryetare e Komunës së Preshevës, edhe pse vendkalimet në Muçibabë dhe te Dheu i Bardhë aktualisht nuk janë të bllokuara, unë jam thellësisht e shqetësuar me veprimet që kanë ngritur tensione dhe destabilitet në rajon. Komuna jonë ka një numër të madh studentësh dhe punëtorësh që çdo ditë udhëtojnë drejt Kosovës. Çdo akt i mbylljes së dhunshme, qoftë përmes protestave apo veprimeve të tjera, përbën një rrezik real që mund të shkaktojë probleme edhe më të mëdha.Kjo situatë vetëm sa rëndon më tej pozitën e shqiptarëve në Luginën e Preshevës, duke ndikuar negativisht në jetën e përditshme dhe duke i shtuar ndjenjën e izolimit një komuniteti që tashmë përballet me sfida të mëdha ekonomike dhe shoqërore.”, ka shkruar ajo në Facebook./21Media
Dëshiron ta dëgjosh këtë lajm me zë?