Ambasada SHBA-së nxit Kosovën për gazin natyror: Nuk prodhoni energji të mjaftueshme
Ambasada e SHBA-së në Kosovë ka nxitur Kosovën për t’iu bashkuar gazit natyror të lëngshëm duke thënë se Kosova aktualisht nuk prodhon energji të mjaftueshme për të mbuluar kërkesën e brendshme.
Në një përgjigje për RTV21 ambasada tha se Kosova ka nevojë për të gjitha burimet e energjisë në dispozicion për të përmbushur rritjet e pritura të kërkesës në të ardhmen.
“Shtetet e Bashkuara mbështesin iniciativat për të diversifikuar burimet e energjisë të Kosovës. Kjo përfshin përdorimin e teknologjisë amerikane për gazifikimin e qymyrit, qymyrin e linjitit vendas, burimet e rinovueshme të energjisë dhe nxitjen e Kosovës për t’u bashkuar me tubacionin e gazit natyror të lëngshëm (LNG) të përshkruar në artikullin tonë javën e kaluar. Një gjë është e qartë: Kosova aktualisht nuk prodhon energji të mjaftueshme për të mbuluar kërkesën e brendshme. Kosova ka nevojë për të gjitha burimet e energjisë në dispozicion për të përmbushur rritjet e pritura të kërkesës në të ardhmen, për të rritur diversitetin dhe sigurinë e energjisë, si dhe për të zvogëluar varësinë nga importet e kushtueshme të energjisë elektrike. Diversifikimi nuk ka të bëjë me zgjedhjen e një burimi mbi një tjetër; ka të bëjë me sigurimin që Kosova të ketë mundësi të shumta të besueshme në dispozicion për të përmbushur kërkesën në rritje në të ardhmen”, tha për RTV21 një zëdhënës i Ambasadës së SHBA-së në Prishtinë./RTV21/21Media
Dëshiron ta dëgjosh këtë lajm me zë?