Kilaj, Smakaj e Fazliu pritet të nisen për në Hagë
Ish-kryetari i Malishevës, Isni Kilaj, ish-shefi i AKI-së Bashkim Smakaj dhe ish-pjesëtari i UÇK-së, Fadil Faziu, të cilët të enjten janë arrestuar në një aksion të Zyrës së Prokurorit të Specializuar, nga momenti në moment pritet të nisen për në Hagë. Kështu raporton ekipi i RTV21 nga zyrat e EULEX-it në Fushë Kosovë ku po mbahen të arrestuarit.
ZPS-ja të enjten ka njoftuar se aksioni ka të bëjë me dyshimet për vepra penale kundër administrimit të drejtësisë.
Djali i Fadil Fazliut, Fahriu, të premten në një prononcim për portalin rtv21.tv ka thënë se ai ka kërkuar që ta takojë babain e tij po që nuk i është lejuar.
Ai ka thënë se zyrtarë të EULEX-it nuk i kanë dhënë informata atij e as avokatit të Fazliut, nëse babai i tij do të dërgohet në Hagë. /21Media