Ikja e zyrtarëve të IT-së në komunat e Kosovës, Krasniqi: Qeveria ka mashtruar profesionistët e IT-së

Ikja e zyrtarëve të IT-së në komunat e Kosovës është fenomen që është duke u përballur vendi jonë. Lidhur me këtë kyesuesi i Kolegjumit të Zyrtarëve të Teknologjisë Informative të Komunave në Asociacionin e Komunave të Kosovës, Ukë Krasniqi, thotë se Qeveria e Republikës së Kosovës ka mashtruar profesionistët e Teknologjisë Informative për shkak të diskriminimit me ligjin e ri të pagave.

Ai për portalin rtv21.tv ka thënë se ”Qeveria e Kosovës ka mashtruar profesionistët e IT-së”.

“Ata që punojnë për shërbimin dhe zhvillimin e komunave, profesionistët tanë të fushës së Teknologjisë Informative, nuk kanë përfituar deri më tani asnjë CENT rritje të pagës nga hyrja në fuqi e Ligjit të ri të Pagave (para 2 vitesh). Po ashtu, me rritjen e gjysmë koeficientit në muajin Janar të këtij viti, Zyrtarët e TI-së së Komunave, nuk kanë përfituar asnjë CENT. Ky është një akt diskriminimi dhe injorimi i plotë ndaj një grupi kaq të rëndësishëm për funksionimin e administratës shtetërore në shërbim të qytetarëve të secilës Komunë”, deklaron Krasniqi.

Krasniqi ka thënë se zyrtarët e IT-së në Institucionet Qendrore janë futur në listën e ekspertëve, ndërkaq sipas tij diskriminimi, padrejtësia dhe shkelja e ligjit ka ndodhur vetëm tek zyrtarët e IT-së së komunave të Kosovës.

“Tek Zyrtarët e TI-së në Institucionet Qendrore kjo e drejtë është realizuar me kohë duke u futur në listën e Ekspertëve, ndërsa diskriminimi, padrejtësia dhe shkelja e ligjit ka ndodhur tek Zyrtarët e TI-së së Komunave duke krijuar kështu pabarazi që për punën e njejtë, të jetë paga e njejtë. Pra, ne kërkojmë drejtësi dhe barazi për profesionistët e Teknologjisë Informative të Komunave, kategori profesionale kjo nga e cila varet secila Komunë dhe profesion i cili është shumë i kërkuar në tregun e punës vendor dhe ndërkombëtar. Për më tepër, përjashtimi i IT-ve të Komunave nga listat e ekspertëve është goditje e madhe për ne. Me këtë mospërfillje, kemi mbetur kategoria më e përbuzur dhe më e diskriminuar në Institucionet Komunale, ani pse i gjithë Institucioni varet nga puna jonë profesionale e Teknologjisë Informative. Komunat tani mund të përballen me një problem shumë serioz: mos ofrimi i shërbimeve profesionale dhe dorëheqje masive nga pozitat e TI-së. Dhe ky është një zhvillim që mund të shkaktojë pasoja tepër të rënda për administratën lokale dhe ofrimin e shërbimeve për qytetarë. Ky është një problem që duhet adresuar me urgjencë për veprim të menjëhershëm për të drejtat ligjore të profesionistëve të Teknologjisë Informative të Komunave të Kosovës”, thekson Krasniqi për portalin rtv21.tv

Sa i përket ikjes së zyrtarëve të IT-së në komuna ai thotë se diskriminimi i kësaj kategorie po ndikon në largimin e tyre nga Institucionet Komunale.

Ai thotë se zyrtarët e IT-së në komuna nuk janë duke pasur përkrahje nga kryetarët e komunave.

“Nuk mund të lejojmë që të injorohet puna dhe kontributi i njerëzve të kualifikuar dhe me përvojë të madhe të cilët mbajnë sistemet kompjuterike e që e bëjnë administratën të funksionojë. Profesionistët e TI-së në Komuna janë të pa zëvendësueshëm dhe pa ata, komunat do të përballen me pasoja të rënda në ofrimin e shërbimeve për qytetarë. Nga përbuzja dhe diskriminimi i kësaj kategorie tepër të rëndësishme në Institucionet shtetërore, disa prej tyre janë larguar tashmë nga Institucionet Komunale dhe disa prej tyre kanë paralajmëruar dorëheqje sepse këta zyrtarë të TI-së nuk janë duke u përkrahur as nga kryetarët e Komunave. Me largimin e tyre, Komunat do të humbin kuadro dhe Ekspertë me përvojë, duke krijuar boshllëk dhe një kaos në mbështetjen e stafit, administrimin dhe menaxhimin e sistemeve me rëndësi shtetërore dhe në ofrim të shërbimeve për qytetarë. Për këtë arsye, kërkojmë një reagim të menjëhershëm dhe mbështetje të fuqishme nga të gjitha institucionet përkatëse: Qeveria, MPB, ASHI dhe Komuna, që këtë kategori të ndjeshme ta trajtojnë sipas ligjit të ri të pagave Nr. 08/L-196, ku neni 4 paragrafi 1 pika 1.4 thotë: Parimi i barazisë dhe mos-diskriminimit – nënkupton që secili, pa kurfar diskriminimi, ka të drejtë që për punë të barabartë të merr pagë të barabartë”, deklaron Krasniqi. /21Media