Irani paralajmëron për shkelje të armëpushimit pas planit të SHBA-së për shoqërimin e anijeve në Hormuz
Një deputet i lartë iranian, Ebrahim Azizi, ka paralajmëruar të hënën në mëngjes se çdo përfshirje e Shteteve të Bashkuara në administrimin e transportit detar në Ngushticën e Hormuzit do të konsiderohej shkelje e armëpushimit.
“Çdo ndërhyrje amerikane në regjimin e ri detar të Ngushticës së Hormuzit do të konsiderohet shkelje e armëpushimit. Ngushtica e Hormuzit dhe Gjiri Persik nuk do të menaxhohen nga postimet deluzionale të Trump-it! Askush nuk do t’u besonte skenarëve të lojës së fajit!”, tha ai në X.
Deklaratat e tij vijnë pas komenteve të Trump të bëra të dielën, ku ai tha se SHBA-ja do të ndihmojë në drejtimin e anijeve të bllokuara në Ngushticën e Hormuzit për t’i nxjerrë nga zonat e kufizuara detare, transmeton KosovaPress.
Në një postim në platformën e tij Truth Social, Trump e përshkroi këtë veprim si një “gjest humanitar”, duke thënë se synon të ndihmojë vendet neutrale që nuk janë të përfshira në konfliktin SHBA–Izrael kundër Iranit.
Dëshiron ta dëgjosh këtë lajm me zë?