Nis protesta para Policisë, bashkohen edhe deputetët

Protesta ka filluar në orën 12:00

Iniciativa e Të Rinjve për të Drejtat e Njeriut në Kosovë ka filluar protestën para Stacionit Qendror të Policisë në Prishtinë. Kjo protestë vjen pas rasteve të fundit të raportuara në media për përdhunime të femrave.

Para stacionit të Policisë janë mbledhur qytetarë të shumtë, ndër ta shoqëri civile, gazetarë e deputetë të Kuvendit të Kosovës.

Trina Binaku, njëra nga organizatoret e kësaj proteste ka thënë për RTV21 se kjo protestë me moton ‘Përdhunuesit në burg’ është organizuar me qëllim të dënimit dhe kundërshtimit të dhunës sistematike brenda institucioneve të Kosovës ndaj grave. Organizatorja ka paralajmëruar se do të marrin pjesë edhe në protestën e nesërme që organizohet në Drenas nga Shoqëria Civile.

Ditën e martë në media u raportua se e mitura nga Drenasi ishte keqpërdorur seksualisht nga profesori SH. XH dhe nga hetuesi policor V. V, ky i fundit e kishte lënë shtatzënë të miturën e pastaj e kishte detyruar që të abortojë. Polici në fjalë është arrestuar. Lidhur me rastin Kryetari i Komunës së Drenasit, Ramiz Lladrovci ka mbajtur një konferencë për media, ku ka treguar për rrjedhshmërinë e ngjarjes. Ai po ashtu ka bërë të ditur se mësimdhënësi SH. XH është ripezulluar nga puna.

Hetuesi i dyshuar do të përballet me gjykatën në orën 14:00./21Media