Haradinaj: 36 prej nesh prej sot nuk janë më, pushteti duhet të kthjellet

Kryetari i Aleancës për Ardhmërinë e Kosovës, Ramush Haradinaj, reagoi pas raportit se sot 36 qytetarë e kanë humbur betejën me COVID-19.
Haradinaj tha se ky është një rekord i zi për Kosovën, duke shtuar se përtej politikës, ky pushtet e kjo klasë politike duhet të kthjellet.
Sipas tij, Qeveria duhet t’i orientojë krejt potencialet njerëzore e financiare në mbrojtje të shëndetit të popullit.
“36 prej nesh, prej sot nuk janë më. Ky është një rekord i zi për Kosovën. Përtej politikës, ky pushtet e kjo klasë politike duhet të kthjellet.
Situata është jashtëzakonisht e rëndë dhe nuk menaxhohet me takime rutinë e me masa sipërfaqësore. Qeveria duhet t’i orientojë krejt potencialet njerëzore e financiare në mbrojtje të shëndetit të popullit. Detyrë mbi detyrat sot është mposhtja e sëmundjes së shekullit.
Me shpresë se ky i sotmi është rekordi i fundit i zi, e ftoj Kryeministrin Kurti ta kuptojë seriozitetin e gjendjes së krijuar dhe të veprojë në përputhje me situatën. Atyre që sot e gjithë këto ditë i kanë humbur të dashurit e tyre, ngushëllimet më të sinqerta!”, shkroi Haradinaj në Facebook./21Media