Kurti falënderon Mbretërinë e Bashkuar për edukimin dhe trajnimin e oficerëve të rinj
Kryeministri Albin Kurti, takoi sot shefen për politikë të gjerë evropiane të Ministrisë së Mbrojtjes së Mbretërisë së Bashkuar, Sarah Graham.
Kurti vlerësoi vizitën e Graham në Kosovë, që vie para vizitës së Ministrit të Mbrojtjes, Armend Mehaj në Ministrinë e Mbrojtjes së Mbretërisë së Bashkuar. Ai e falënderoi për kontributin e Mbretërisë së Bashkuar në edukimin dhe trajnimin e oficerëve të rinj, të cilët kthehen në Kosovë me njohuri dhe motivim të lartë.
“Fituesit e Shpatës së Nderit të Akademisë Ushtarake Mbretërore Sandhurst (Royal Military Academy Sandhurst) janë ambasadorët më të mirë të përkushtimit dhe potencialit të Forcës së Sigurisë së Kosovës”, tha Kurti.
Kryeministri theksoi punën dhe synimin e Qeverisë për anëtarësim në programe e nisma rajonale e ndërkombëtare, si A5 dhe Partnership for Peace (Partneriteti për paqe).
Duke vlerësuar rolin e rëndësishëm të Mbretërisë së Bashkuar, si aleat i shtetit tonë, Kurti shprehu mirënjohjen e thellë për ndihmën dhe përkrahjen që shteti britanik ia ka dhënë Kosovës. Ai theksoi përkushtimin e Qeverisë për të thelluar edhe më shumë marrëdhëniet bilaterale me Mbretërinë e Bashkuar.
Kurse nga ana e saj, Graham përsëriti përkrahjen në planin afatgjatë për Kosovën dhe shprehu përkushtimin e vazhdueshëm të Mbretërisë së Bashkuar për mjedis të qetë dhe të sigurt në Kosovë. Ajo vlerësoi angazhimin institucional për të garantuar sigurinë në vend dhe stabilitetin në rajon.
U diskutua për veprimet dhe masat që institucionet e Republikës së Kosovës kanë ndërmarrë, me qëllim parandalimin e përhapjes së pandemisë COVID-19 dhe ruajtjen e shëndetit publik.
Në takimin që u zhvillua në Zyrën e Kryeministrit, ishin të pranishëm edhe ministri i Mbrojtjes, Armend Mehaj, ambasadori i Mbretërisë së Bashkuar në Kosovë, Nicholas Abbott dhe bashkëpunëtorë të tjerë./21Media
Dëshiron ta dëgjosh këtë lajm me zë?