Zotimet e ministrit Aliu për modernizimin e linjave hekurudhore

Ministri i Mjedisit, Planifikimit Hapësinor dhe Infrastrukturës, Liburn Aliu, së bashku me përfaqësues nga Bashkimi Evropian dhe Sekretariati i Komunitetit të Transportit, kanë mbajtur një konferencë për media ku kanë folur për ecurinë e rehabilitimit gjeneral dhe modernizimit të linjës hekurudhore.
Aliu gjatë konferencës është pyetur nëse rritja e çmimeve për produktet që nevojiten për rehabilitimin dhe modernizimin e linjave hekurudhore do të ndikojë në zhvillimin e projektit.
Përgjigja e tij ka qenë se janë duke u përpjekur që të mos e lejojnë një gjë të tillë.
“Rritja e çmimeve në përgjithësi e produkteve ndërtimore dhe përgjithësisht për derivatet e naftës dhe e të gjitha produkteve tjera natyrisht që i ka ndikimet e veta dhe ne po bëjmë përpjekje që këto ndikime të mos pengojnë në zhvillimin e projektit”, ka thënë Aliu.
Rehabilitimin dhe modernizimin e hekurudhave Aliu e ka cilësuar si një projekt me rëndësi për Kosovën.
Ai po ashtu ka paralajmëruar se do të ketë edhe bashkëpunime të tjera në mes Kosovës dhe Bashkimit Evropian.
Tutje ai ka shtuar se pikën e stacionit hekurudhor që gjendet në Miradi të Fushë Kosovës do ta shndërrojnë në një pikë të rëndësishme të mallrave.
“Këtë pikë do ta shndërrojmë në një pikë të rëndësishme të mallrave. Përpos rëndësisë së brendshme, ky projekt ka rëndësi edhe në kyçje në rajon”, ka thënë Aliu.
Tutje ai ka shtuar se pritet që Kosova të ketë projekte të reja të cilat do të jenë në bashkëpunim me BE-në.
Madje ai ka thënë se transporti në Kosovë pritet që të zhvillohet. Aliu ka thënë se kyçja në portën e Durrësit do t’i mundësoj Kosovës edhe kyçje në transportin detar e madje do të zhvillohet edhe transporti ajror.
“Kyçja në portën e Durrësit do të na mundësoj edhe kyçje në transportin detar. Duke e pasur aeroportin afër do të kyçemi edhe në transportin ajror”, tha Aliu.
Një fjalë rasti në këtë konferencë pati dhe përfaqësuesi nga BE-ja, i cili është koordinator i komunitetit të transportit për gjashtë vende të Ballkanit, Matej Zakonshek.
Ai po ashtu e vlerësoi këtë projekt si të rëndësishëm për Kosovën, por edhe për Evropën.
Zakonshek tha se një nga prioritetet e tyre është që të modernizojnë transportin në rajon./kallxo