Policia jep detaje për vrasjen: 51-vjeçari u qëllua në banesën e tij

(Lajm i përditësuar)

Detaje të tjera janë mësuar lidhur me të shtënat me armë zjarri në Shkodër. Mësohet se viktima, P.V, 51 vjeç, është qëlluar në banesën e tij. Ai kishte vetëm një muaj që ishte kthyer nga Anglia.

Ndërkohë, nuk ka asnjë detaj nga autori apo autorët që kanë ekzekutuar 51-vjeçarin. Policia bën me dije se ka ngritur pika kontrolli, ndërsa ende nuk është e qartë dinamika e ngjarjes.

Njoftimi i plotë:

Rreth orës 12:15, në lagjen “Tom Kola”, në rrethana ende të paqarta, në banesë, është vrarë me armë zjarri shtetasi P. V., 51 vjeç.

Shërbimet e Policisë dhe grupi hetimor kanë shkuar menjëherë në vendngjarje.

Janë ngritur pika kontrolli dhe po ushtrohet kontroll në zonë për kapjen e autorit të dyshuar.

Grupi hetimor, në drejtimin e Prokurorisë, po vijon punën për sqarimin e rrethanave të ngjarjes, si dhe për sigurimin e çdo prove, me qëllim identifikimin dhe kapjen e autorit.

Të shtëna me armë, dyshohet për një të vrarë

Një ngjarje e rëndë ka ndodhur në Shkodër.

Nga burimet e para raportohet për të shtëna me armë, ku dyshohet për një të vrarë.

Mësohet se të shtënat me armë zjarri kanë ndodhur te varrezat katolike në lagjen Skënderbej./oranews