Aktakuza për Banjskën: Të akuzuarit tentuan ta shkëpusin veriun e Kosovës e t’ia bashkojnë Serbisë
(Lajm i përditësuar)
Aktakuza për Banjskën: Të akuzuarit tentuan ta shkëpusin veriun e Kosovës e t’ia bashkojnë Serbisë
Sipas aktakuzës së ngritur nga Prokuroria Speciale për rastin e Banjskës ekziston dyshimi i bazuar mirë se 45 personat e akuzuar me në krye Milan Radoiçiqin, kanë kryer veprën penale, “Veprat e rënda kundër rendit kushtetues dhe sigurisë së Republikës së Kosovës” e sanksionuar me nenin 126 paragrafi 1, nënparagrafi 1.1 dhe 1.2 lidhur me nenin 118 të Kodit Nr. 06/L-074 Penal të Republikës së Kosovës (KPRK).
Në aktakuzë thuhet se ata kanë tentuar ta shkëpusin veriun Kosovës e t’ia bashkojnë Serbisë.
Sipas aktakuzës të akuzuar në këtë rast përveç Milan Radoiçiqit janë edhe Blagoje Spasojeviq, Vladimir Toliq, Dusan Maksimoviq, Vladimir Radivojeviq, Ugljesa Jarediq, Milorad Jevtiq, Vlastimir Andriq, Aleksandar Milosavljeviq, Lazar Smigiq, Veljko Djordjeviq, Vladimir Vuçetiq, Stefan Jovanoviq, Milovan Krstoviq, Uros Miliq, Trajko Vasiq, Danilo Vasiq, Vukasin Jarediq, Sasa Periq, Nemanja Stankoviq, Momçilo Vuckoviq, Stefan Radojkoviq, Marjan Radojeviq, Marko Arsiq, Zarko Cvetkoviq, Krsto Damjanoviq, Stefan Milosavljeviq, Marko Saviq, Aleksandar Jevremoviq, Rados Gvozdiq, Ivan Miliq, Gojko Zubaq, Nemanja Radivojeviq, Radak Adziq, Milos Milenkoviq, Dorde Baloviq, Danijel Dukiq, Danilo Virijeviq, Aleksandar Tanaskoviq, Milos Kragoviq, Miljan Nedeljkoviq, Nikola Iliq, Vladan Iliq, Radule Steviq dhe personi juridik “RAD D.O.O” (shoqëri me përgjegjësi të kufizuar), me pronar dhe përfaqësues të autorizuar Radule Steviq.
Sipas aktakuzës ekziston dyshimi i bazuar mirë se Radoiçiqi ka kryer veprën penale “Lehtësimi dhe financimi në kryerjen e terrorizmit” ” e sanksionuar me nenin 131 i KPRK-së, lidhur me nenin 57 të Ligjit për parandalimin e pastrimit të parave dhe luftimin e financimit të terrorizmit.
“Në periudhën kohore nga viti 2017 deri më 24 shtator 2023, i pandehuri Milan Radoiçiq, në cilësinë e kreut të grupit terrorist të strukturuar, ka siguruar të ardhura në mënyrë të tërthortë, ku pjesa më e madhe e tyre janë përdorur për armatim të rëndë – blerje dhe furnizim me armë të rënda për grupin terrorist, uniforma ushtarake – sigurimi i uniformave për pjesëmarrësit e grupit, mbështetje logjistike – sigurimi i pajisjeve dhe shërbimeve logjistike për operacionet e grupit, pagesën e pjesëmarrësve të grupit – financimi i pjesëmarrësve të grupit terrorist për të siguruar përfshirjen dhe angazhimin e tyre të vazhdueshëm në veprimtaritë kriminale, veprime këto me qëllim të lehtësimit dhe financimit të veprave terroriste, rrjedhimisht krijimit të kapaciteteve të nevojshme për kryerjen e akteve terroriste”, thuhet në aktakuzë.
Radoiçiqi akuzohet edhe për veprën penale “Shpërlarja e parave” e sanksionuar me nenin 302 të KPRK-së, lidhur me nenin 56 par.1 nën paragrafi 1.1 të Ligjit për parandalimin e pastrimit të parave dhe luftimin e financimit të terrorizmit.
“Nga data 01.01.2017 deri më datë 24.09.2023, i pandehuri Milan Radoiçiq duke e ditur se një pjesë e të hyrave e tij burojnë nga aktiviteti kriminal i përcaktuar si në pikën III të dispozitivit dhe aktivitetit tjetër kriminal, përmes bashkëpunimit dhe ndihmës së të pandehurit Radule Steviq – pronar dhe person përgjegjës i bizneseve ‘RAD D.O.O’ dhe ‘Radule Steviq B.I’ dhe aktivitetit ekonomik të tyre, këto para i ka konvertuar në pasuri të paluajtshme dhe të luajtshme, ku një pjesë të pasurive të paluajtshme e ka transferuar dhe tek personat e tretë, me qëllim të fshehjes ose maskimit të burimit të pasurisë”, thuhet në aktakuzë.
Prokuroria Speciale ngrit aktakuzë ndaj 45 personave për rastin “Banjska”
Prokuroria Speciale e Kosovës ka ngritur aktakuzë k ndaj 45 personave për sulmin terrorist në Banjskë të Zveçanit më 24 shtator 2023.
Kjo u bë e ditur në një konferencë për media të mërkurën nga Kryeprokurori i Prokurorisë Speciale, Blerim Isufaj.
Isufaj tha se për këtë kanë punuar intezivisht.
“Prokuroria Speciale ka kryer punë intensive disamujore në këtë rast të madh dhe kompleks. Pas përfundimit të hetimeve, pas grumbullimit të provave dhe duke u mbështetur në to ka ngritur aktakuzë kundër 45 të pandehurve të përfshirë në këtë rast”, tha Isufaj.
Policia e Kosovës më 24 shtator të vitit të kaluar është sulmar nga një grup i armatosur serb në Banjskë, si pasojë e kësaj mbeti i vrarë rreshteri Afrim Bunjaku.
Kurse nga shkëmbimi me armë janë vrarë edhe tre sulmues serb.
Për këtë sulm përgjegjësi pati marrë ish-nënkryetari i Listës Serbe, Milan Radoiçi. I njëjti aktualisht ndodhet në Serbi ku edhe po mbrohet në liri./21Media