Partia konservatore gjermane, Unioni Demokristian (CDU), ka zgjedhur Armin Laschet, kryetar të ri të partisë.

Laschet, 59 vjeç, ka mposhtur në garën zgjedhore konservatorin, njëherësh rivalin e kancelares Angela Merkel, Friedrich Merz.

Në konventën partiake, që është mbajtur online për shkak të pandemisë së koronavirusit, Laschet ka fituar 521 vota dhe Merz 466. Ndërkaq, Nobert Roettgen është eliminuar në raundin e parë të votimeve.

Zgjedhjet e brendshme në CDU kanë ardhur pasi kanclerja Angela Merkel ka paralajmëruar largimin nga politika më vonë gjatë këtij viti.

Në fjalimin e tij pas fitores, Laschet është zotuar se do të bëjë gjithçka që partia e tij të dalë mirë në zgjedhjet e ardhshme rajonale dhe se ai do të mbajë postin e kancelarit.

“Për më tepër, zgjedhje më të rëndësishme janë para nesh”, ka thënë ai ai, i cili ka qenë nënkryetar i CDU-së që prej vitit 2012.

Delegatët për herë të parë kanë mbajtur konventën partiake online, për shkak se masat e vendosura kundër koronavirusit ndalojnë mbajtjen e tubimeve.

Gara në CDU ka ardhur në një vit të rëndësishëm për Gjermaninë, e cila do të mbajë zgjedhje nacionale në shtator.

Merkel, e cila ka thënë se do të tërhiqet nga politika, ka mbajtur katër mandate si lidere e partisë dhe 16 vjet si kancelare.

Gjatë nisjes së konferencës më 15 janar, Merkel ka bërë thirrje për unitet.

“Shpresoj që do të zgjidhet një ekip që merr në duar të veta fatin e partisë sonë dhe punon me të gjithë anëtarët për të gjetur përgjigjet e duhura për sfidat e së ardhmes”, ka thënë Merkel.

Më 2018, Merkel ka njoftuar se do të tërhiqej nga posti i kryetares së CDU-së, teksa kjo parti ka nisur të humbë besimin dhe është sfiduar lidhur me pozicionin ndaj ekstremit të djathtë, që është në rritje.

Ajo është zëvendësuar nga kandidatja e saj e preferuar, Annegret Kramp-Karrenbauer. Por, Kramp-Karrenbeuer ka dhënë dorëheqje në shkurtin e kaluar, për shkak të një skandali lidhur me menaxhimin e zgjedhjeve rajonale.

Që atëherë, CDU-ja ka qenë e detyruar që të anulojë dy takime për të zgjedhur liderin e ri, për shkak të krizës me pandeminë e koronavirusit./rel