Atentat shqiptarit në Greqi, plagoset me tre plumba

Një shqiptar ka mbetur i plagosur në Athinë. Sulmi i armatosur ka ndodhur pak para orës 04:00 të mëngjesit ndaj një 34-vjeçari i cili ndodhej në një park në rrugën Sidirokastro në zonën e Botanikos.

Pas të shtënave, shqiptari ka mbërritur me makinën e tij në cep të rrugës ‘Iera Odos’ dhe ‘Spyrou Patsi’, ku ka kërkuar ndihmë nga policët që po patrullonin me makinë.

Sipas policisë, i riu shqiptar, është dërguar në spitalin Giorgos Gennimatas ku po trajtohet për lëndime në bark.

Mediat greke raportojnë se autorët kanë qenë duke hipur në një mjet me të cilin i janë afruar 34-vjeçarit para se ta qëllonin tre herë.

Të njëjtat informacione bëjnë me dije se në vendin ku ndodhi krimi janë gjetur tre gëzhoja të kalibrit 9 mm.

Ndërkohë, shqiptari rezulton me precedent penal, pasi në vitin 2019 është arrestuar për një çështje droge, por provat e deritanishme nuk tregojnë për përfshirjen e tij në ndonjë rast tjetër të rëndë./oranews