Barça mund t’ia prishë kontratën Lewandowskit për këtë arsye
Robert Lewandowski është përshtatur në mënyrën më të mirë të mundshme te Barcelona, pas kalimit nga Bayerni.
Reprezentuesi polak ka shënuar 5 gola në katër ndeshjet e luajtura në La Liga, në të cilat ka startuar në të gjitha.
Por skuadra blaugrane ka siguruar një klauzolë në kontratën e tij, që përfshin opsionin e ndërprerjes së saj, nëse në sezonin e tretë, polaku luan më pak se 55 për qind të ndeshjeve.
Programi “Què t’hi jugues” zbuloi sot disa nga detajet e dokumentacionit të Lewandowskit, i cili këtë verë iu bashkua Barçës deri në qershor 2026.
Sulmuesi 34-vjeçar polak është në formë të shkëlqyer, por drejtuesit e Barcelonës kanë dashur të sigurohen që nëse nuk ruan nivelin ose pjesëmarrjen, mund të largohet.
Këtë sezon, ai do të ketë një pagë neto prej 10 milionë eurosh, në 23-24 do të rritet në 13 dhe në 24-25 në 16.
Në sezonin e fundit 2025-26, në rast se i vazhdohet kontrata, paga do t’i bie në 13 milionë.
Por përveç kësaj, bonuset fillojnë me 300 mijë deri në 1 milion euro, nëse Barcelona arrin të fitojë tripletën.
Vetëm fitimi i Kupës së Mbretit nuk aktivizon ndonjë bonus shtesë, ai duhet të kombinohet me cilindo nga dy trofetë e tjerë: LaLiga dhe Champions.
Barcelona e mbylli nënshkrimin e Lewandowskit me 45 milionë plus pesë në bonuse. Klauzola e largimit të tij është 500 milionë.
Dëshiron ta dëgjosh këtë lajm me zë?