Bashkim dhe Shpëtim Bajoku përfaqësojnë Kosovën në finale të kampionatit Ballkanik 

 

Federata e Boksit të Kosovës ka njoftuar se sot në finale të kampionatit Ballkanik të boksit, që po zhvillohet në Zagreb të Kroacisë, do të përfaqësohet nga Bashkim Bajoku në kategorinë e 52 kilogramëve dhe me Shpëtim Bajokun në kategorinë e 64 kilogramëve.

Në përballjet e ditës së djeshme, Shpëtim Bajoku ka mposhtur boksierin slloven, Veber Nik Nikolov me rezultat unanim nga gjyqtarët dhe kështu është kualifikuar për në finalen e këtij kampionati në Zagreb.

Në anën tjetër, Besart Pireva në kategorinë e 81 kilogramëve është mposhtur nga përfaqësuesi serb, Mironchikov Vladimir me vendim unanim nga gjyqtarët, në një luftë që ishte thuajse e barabartë dhe kështu ka siguruar medaljen e bronztë, së bashku me përfaqësuesin tjetër Patriot Behramin.