Betohet kryetari i Leposaviqit
(Lajm i përditësuar)
Ka dhënë betimin edhe kryetari i ri i Komunës së Leposaviqit, Lulzim Hetemi.
Nënkryetarja e komunës së Leposaviqit do të jetë nga komuniteti serb
Sot janë betuar kryetarët e rinj të Zubin-Potokut dhe Zveçanit. Sot do e bënë betimin edhe kryetari i Leposaviqit, Lulzim Hetemi nga radhët e Lëvizjes Vetëvendosje.
RTV21 ka mësuar se nënkryetarja e komunës së Leposaviqit do të jetë nga komuniteti serb.
Peci do ta ushtrojë detyrën nga fshati Lipë
Kryetari i ri i Zveçanit, Ilir Peci në një konferencë për media ka thënë se do t’i shërben të gjithëve pa dallim.
Selvete Kelmenedi është zgjedhur kryesuesja e kuvendit, ndërsa nuk është zgjedhur nënkryetari i komunës.
Peci, ka konfirmuar të enjten se do ta ushtrojë detyrën si udhëheqës i Komunës nga objekti i zyrës së komuniteteve që gjendet në fshatin Lipë.
Betohet kryetari i Zubin-Potokut Izmir Zeqiri
Kryetari i zgjedhur i komunës së Zubin Potokut, Izmir Zeqiri, deklaroi se do të ofrojnë shërbime për të gjithë qytetarët e kësaj komune, pa asnjë dallim.
Pas betimit si kryetar, tha se do të plotësojnë kërkesat e të gjithë qytetarëve, përfshirë atyre nga komuniteti serb.
Kandidati i PDK-së i cili doli i pari në zgjedhjet e 23 prillit në Zubin Potok, u betua në një seancë solemne në fshatin Çabër.
Gjithçka kaloi qetësisht dhe pa ndonjë incident.
Seancën solemne të Kuvendit Komunal, i cili përbëhet prej 19 këshilltarëve, prej të cilëve dy janë serb, e udhëhoqi anëtari më i vjetër, Sefer Veseli.
Betohet Ilir Peci Kryetar i ri i komunës së Zveçanit
Kryetari i ri i Zveçanit, Ilir Peci ka bërë betimin e tij si kryetar i kësaj komune. Peci u betua në shkollën fillore “Isa Boletini” në fshatin Boletin.
Peci ishte kandidat i PDK-së në zgjedhjet e 23 prillit, në të cilat doli fitues.
View this post on Instagram
Ilir Peci arrin te shkolla “Isa Boletini” ku do të betohet
Kryetari i ri i Zveçanit, Ilir Peci ka arritur tashmë në shkollën fillore “Isa Boletini” në fshatin Boletin, ku do të betohet.
Betimi i Pecit është paraparë nga ora 10:00. Në ambientin rreth shkollës janë parë forca të Policisë së Kosovës dhe të EULEX-it.
View this post on Instagram
Tre kryetarët e komunave veriore sot betohen në ndërtesa publike
Tre kryetarët e komunave veriore sot betohen në ndërtesa publike. Kryetarët e zgjedhur në tri komunat veriore, Leposaviq, Zubin Potok dhe Zveçan pritet të betohen të enjten në orën 10:00 Kështu ka bërë të ditur të mërkurën kryeministri i Kosovës, Albin Kurti.
Ai në mbledhjen e qeverisë ka thënë se nuk është normale që tash e 6 muaj këto komuna kanë mbetur pa kryetar, por edhe qytetarët pa shërbime komunale.
Shefi i ekzekutivit kosovar deklaroi se veprimet e tyre kanë në qendër funksionalizimin demokratik të institucioneve shtetërore dhe garantimin e shërbimeve publike për të gjithë qytetarët pa dallim.
Ndërsa, të premten (19 maj) në seancë solemne në objektin e Komunës së Mitrovicës Veriore është betuar si kryetar, Erden Atiq, i cili ka emëruar edhe katër drejtorë komunalë. Vendimi i parë që Atiq ka marrë, ka qenë emërimi i Katarina Agjanqiq nga komuniteti serb si nënkryetare të komunës./21Media