Biden e do Von der Leyen në krye të NATO-s

Joe Biden po përpiqet që shefja e BE-së, Ursula von der Leyen, të jetë Shefe e ardhshme e NATO-s.

Presidenti amerikan thuhet se do të mbështesë presidentin e Komisionit Evropian për të marrë drejtimin e aleancës ushtarake vitin e ardhshëm, shkruan DailyMail, përcjell rtv21.tv.

Sekretarit aktual të përgjithshëm, Jens Stoltenberg, i janë dhënë edhe 12 muaj të tjerë në krye – duke e zgjatur mbretërimin e tij në një vit të 10-të – pasi komuniteti ndërkombëtar nuk arriti të binte dakord për një pasardhës.

Por vonesa besohet të jetë pjesërisht për shkak se Biden dëshiron që Von der Leyen ta marrë këtë post, pasi mandati i saj në BE përfundon vitin e ardhshëm.

Një burim i NATO-s i tha The Telegraph se Biden po përpiqej të bindte Von der Leyen, një ish-ministre gjermane e Mbrojtjes, për të pasuar Stoltenbergun.

Një tjetër burim tha se Biden dhe Von der Leyen kanë ndërtuar një lidhje të fortë vitet e fundit, duke nxitur lidhje të ngushta transatlantike mbi Kinën, Ukrainën dhe çështjet klimatike.

Von der Leyen vizitoi Shtëpinë e Bardhë në mars, kur SHBA dhe BE njoftuan fillimin e negociatave për një marrëveshje kritike për mineralet.

Udhëheqësit e NATO-s do të takohen në Lituani javën e ardhshme, ku do të merret një vendim për një pasardhës. /21Media