Bislimi: Serbia dëshiron që shqiptarët të mos kenë zë dhe përfaqësim

Zëvendëskryeministri Besnik Bislimi ka thënë se Serbia po vazhdon përpjekjet për të penguar mbështetjen e Qeverisë së Kosovës ndaj shqiptarëve në Luginën e Preshevës, duke tentuar të bllokojë funksionimin e Këshillit Kombëtar Shqiptar (KKSh).
Përmes një postimi në Facebook, Bislimi tha se ky bllokim po bëhet përmes refuzimit të regjistrimit të kryetarit të ri të KKSh-së, Enkel Rexhepit, një veprim që konsiderohet si ndërhyrje politike dhe shkelje e të drejtave të shqiptarëve nga Serbia.
“Ndihma e Kosovës për shqiptarët e Luginës është legjitime, fondet janë transparente dhe përbëjnë një mbështetje të drejtë e të nevojshme. Ndërsa bllokada ndaj funksionimit të KKSh-së është një ndërhyrje politike pa asnjë bazë ligjore, e cila synon ta mbajë këtë institucion jofunksional dhe të pafuqishëm për të mbrojtur të drejtat e shqiptarëve”, ka shkruar Bislimi.
Ai ka theksuar se Serbia synon të kontrollojë institucionet shqiptare në Luginë dhe të shuajë çdo zë të pavarur që kundërshton politikat e saj diskriminuese.
“Serbia dëshiron që shqiptarët të mos kenë zë dhe përfaqësim, por ne nuk do të qëndrojmë indiferentë përballë këtyre shkeljeve,” ka shtuar ai.
Tutje, Bislimi ka theksuar se Qeveria e Kosovës do të vazhdojë mbështetjen ndaj shqiptarëve të Luginës, pavarësisht pengesave të Serbisë.
Bislimi ka bërë thirrje që edhe komuniteti ndërkombëtar të jetë vigjilent ndaj këtyre zhvillimeve dhe të reagojë ndaj përpjekjeve të Serbisë për të shkelur të drejtat e shqiptarëve në rajon.