Bruçaj: Bajrami, dita e shpresave të reja

Bruçaj uron besimtarët për Festën e Fitër Bajramit

Kryetar i Komunitetit Mysliman të Shqipërisë, Skënder Bruçaj ka uruar gjithë besimtarët myslimanë Festën e Fitër Bajramit, duke thënë se Fitër Bajrami është dita e unitetit shpirtëror.

Kreu i myslimanëve shqiptarë në adresimin me rastin e Festës së Bajramit, tha se kjo festë është lehtësim i shpirtit, është kënaqësia e brendshme që buron prej shpresës së përmbushjes së adhurimit dhe përfitimit të faljes prej Allahut, Mëshiruesit Fuqiplotë.

 

“Bajrami është dita e lehtësimit të brengave, është dita e shpresave të reja, është dita e të kujtuarit për njëri-tjetrin, është dita për të gëzuar fëmijët me dhurata dhe përkëdhelje, është dita për të respektuar të moshuarit me mirënjohje dhe dashuri, është dita për t’u gjendur pranë të gjithë atyre njerëzve që presin interesimin dhe vëmendjen tonë. Bajrami është dita kur mëritë, hatërmbetjet, dhe smira marrin fund, është dita kur falen gabimet e të tjerëve, është dita e unitetit shpirtëror që pasqyron ripërtëritjen e vëllazërisë, miqësisë dhe dashurisë për njeriun dhe njerëzoren”, tha Bruçaj.

Duke qenë se nesër në ditën e festës së Fitër Bajramit, Shqipëria mbanë zgjedhjet e përgjithshme, Bruçaj ka ftuar që të gjithë ta përdorin të drejtën e votës, porse pa harruar se të gjithë janë vëllezër dhe pavarësisht rezultatit, Shqipërinë e kanë bashkë, pa dallime politike e fetare.