Çernobili numëron humbje të mëdha pas tërheqjes ruse

Ukraina ka akuzuar ushtrinë ruse se ka plaçkitur dhe shkatërruar zyra, laboratorë dhe punëtori në termocentralin bërthamor të Çernobilit.
Impianti u çaktivizua pas katastrofës së reaktorit të vitit 1986 dhe karburanti i tij bërthamor është nën vëzhgim të ngushtë. Ukraina thotë se niveli i rrezatimit atje është normal dhe pajisjet e reaktorit nuk janë dëmtuar.
Trupat ruse qëndruan atje për pesë javë, më pas u tërhoqën më 31 mars, ndërsa forcat ukrainase kundërsulmuan, transmeton rtv21.tv.
Drejtori i informacionit të faqes Vitaliy Medved i tha BBC-së se rusët kishin vjedhur ose thyer më shumë se 1000 kompjuterë dhe kishin plaçkitur automjete dhe dozimetra të rrezatimit.
Ushtruesi i detyrës së kreut të Çernobilit, Valeriy Seyda, i vlerëson humbjet në 44 milionë funte (54 milion dollarë) dhe thotë se duhet bërë shumë punë riparimi për ta mbajtur impiantin të sigurt dhe funksional.
Kjo punë, siç është ruajtja e mbetjeve bërthamore, kërkon ndihmë nga Agjencia Ndërkombëtare e Energjisë Atomike (IAEA) dhe partnerë të tjerë./21Media