Çfarë u diskutua në takimin e Kurtit me Von der Leyen

Kryeministri Albin Kurti, priti sot në takim presidenten e Komisionit Evropian, Ursula von der Leyen.
Duke e falënderuar për përkrahjen që Bashkimi Evropian ka dhënë për zhvillimin ekonomik dhe social të vendit, Kurti e njoftoi presidenten Von der Layen për Planin e Investimeve Ekonomike me mbi 100 projekte konkrete të ministrive të qeverisë, që kapin shifrën e 2.8 miliardë euro dhe që do të ndihmojnë krijimin e një baze të fuqishme për zhvillimin e vendit.
Kryeministri foli për programin qeverisës dhe reformat e ndërmarra në drejtësi, si dhe luftën e pa kompromis ndaj korrupsionit.
Von der Leyen dhe Kurti diskutuan për angazhimet e qeverisë në fushën e sundimit të ligjit dhe reformat kyçe për zhvillimin dhe përafrimin me BE-në.
U diskutua për reformat si dhe mbështetjen e BE-së për arsimin dhe rininë e sidomos për rëndësinë e sistemit dual të mësimit, zbatimi i të cilit do të ndikojë në uljen e papunësisë, sidomos te të rinjtë.
Biseda pati theks të veçantë liberalizimin e vizave dhe procesin e integrimit të Kosovës në BE, thuhet në njoftim.
Bashkëpunimi rajonal e sidomos bashkëpunimi më i madh ekonomik në mes të vendeve të rajonit në kuadër të Procesit të Berlinit dhe implementimit të Tregut të Përbashkët Rajonal u theksua si domosdoshmëri.
Lidhur me situatën me pandeminë, Kurti e falënderoi presidenten von der Leyen për mbështetjen e BE-së në ballafaqimin e Republikës së Kosovës me virusin COVID-19. Ai e njoftoi me progresin e shënuar me vaksinim, ku edhe pse Kosova ka filluar e fundit, tani qëndron mbi mesataren e rajonit me 62% të popullsisë të përcaktuar për vaksinim me një dozë dhe 41% me dy doza.
Në këtë drejtim u fol edhe për pranimin e certifikatave të COVID-19 nga BE dhe inicimin e procedurave për t’u bërë anëtarë të Certifikatës Digjitale të BE-së për COVID./21Media