Cila moshë është më e prekur nga anemia, si bëhet trajtimi, tregon Dr. Gashi

Specialisti i Mjekësisë Interne-Hematologjisë, Dr. Fitim Gashi ka deklaruar se anemia është një gjendje, e cila karakterizohet me zvogëlimin e eritrociteve, hemoglobinës hematokritit dhe si pasojë ka mungesë të oksigjenit në inde.
Shkaktarët
Ai ka informuar se shkaktarët e paraqitjes së anemisë janë shumë të ndryshme, duke filluar mungesa e hekurit në ushqime.
“Menstruacionet e bollshme te femrat, gjakderdhjet gastrointestinale, sëmundjet infektive, sëmundjet inflamatore, dietat e ndryshme, mungesa e hekurit, vitaminës B, acidit folik. Shkaktarët e anemive mund të jenë: Shkatërrimi prodhimit të eritrociteve, ku mund të jetë e fituar për shkak të sëmundjeve autoimune- anemia aplastike, rrezatimi, barnat dhe kemikalet si: benzeni kloramfenikoli, sëmundjet virale si hepatiti A B C, virusi epstein barr, idiopatike.”, ka treguar Dr. Gashi.

Simptomat
Specialisti i Mjekësisë Interne-Hematologjisë për rtv21.tv ka theksuar se disa prej simptomave më të shpeshta të anemisë janë: lodhja, plogështia trupore, kokëdhimbja, rrahjet e shpeshta të zemrës, dhimbjet e barkut, problemet me fyt.
“Nëse pacienti ka këto simptoma, duhet të lajmërohet te mjeku dhe pas bërjes se analizave hematologjike përcaktohet lloji i anemisë dhe terapia adekuate në bazë të shkaktarit të anemisë. Një lloj i anemisë, e quajtur talasemia, e cila mund të jetë minor dhe major është një sëmundje trashëguese, e cila shfaqet te fëmijet dhe simptomet varirojnë nga lloji talasemisë.”, ka bërë të ditur doktori, sipas të cilit, te kjo sëmundje ndonjëherë ka nevojë që të jepen transfuzione gjaku.

Mosha
I pyetur se cila mosha janë më të prekura nga anemia, Dr.Fitim Gashi ka potencuar se mosha më e përfshirë është mosha adoleshente, te femrat, si dhe shtatzënat, me ç’rast ka informuar se për arsye nutricionale, kanë nevojë për më shumë ushqime që përmbajnë hekur.

Trajtimi
Specialisti i Mjekësisë Interne-Hematologjisë, Dr. Fitim Gashi ka deklaruar se trajtimi i anemisë bëhet në bazë të llojit të anemisë.
“Së pari përcaktohet se cili lloj i anemisë. Nëse kemi anemi hipokromike, pacienti ka nevojë t’i jepen preparate të hekurit. Nëse ka anemi për shkak të infeksionit apo inflamacionit trajtimi bëhet duke u trajtuar sëmundja, e cila e ka shkaktuar aneminë. Te anemia megaloblastike preparatet e vitaminës B12, acidi folik ndihmojnë në përmirësimin e gjendjes.”, ka treguar Dr. Gashi, i cili ka shtuar se pacientët me kimioterapi shpesh kalojnë në anemi për shkak të marrjes së citostatikeve dhe mjeku ordinues e përcakton se kur ka nevojë pacienti që të marrë tranafuzione të gjakut./21Media