Deputetët biseduan me ambasadorin e Zvicrës për marrëdhëniet bilaterale

Komisioni për Punë të Jashtme dhe Diasporë ka zhvilluar takim me ambasadorin e Zvicrës në Kosovë, Thomas Kolly, me të cilin diskutuan për marrëdhëniet bilaterale dhe ndihmën që mund të ofrojë shteti zviceran.
Kryetari i Komisionit, Haki Abazi ka thënë se në takim diskutuan edhe për ndihmën që mund të ofrojë shteti zviceran pasi të jetë anëtar në Këshillin e Sigurimit.
“Biseduam për çështje specifike të marrëdhënieve bilaterale, vazhdimin e mandatit të ushtarëve zviceran në kuadër të KFOR-it, gjithashtu për rolin e Zvicrës si një nga anëtarët e Këshillit të Sigurimit që do të jenë nga 2023-2024 dhe atë ndihmesën që mund të bëjë shteti i zviceran për Kosovën”, ka thënë Abazi.
Deputeti ka thënë tutje se pozicioni i Zvicrës ndaj Kosovës është miqësor, ka lidhje të jashtëzakonshme në mes të dy vendeve edhe për shkak të numrit të madh të diasporës kosovare atje.