Dorëhiqet ndihmësi kryesor i Zelenskyt

Një nga ndihmësit kryesorë të presidentit ukrainas Volodymyr Zelensky ka dhënë dorëheqjen përpara një riorganizimi të pritshëm të qeverisë.
Kyrylo Tymoshenko ishte zëvendës shefi i zyrës së presidentit dhe falënderoi Zelensky për “mundësinë për të bërë vepra të mira çdo ditë dhe çdo minutë”.
Ai ishte përfshirë në skandale të lidhura me përdorimin e makinave të shtrenjta – edhe pse ai mohon keqbërjen.
Zelensky ka sinjalizuar se edhe zyrtarë të tjerë të lartë do të largohen nga qeveria e tij në ditët në vijim.
Udhëheqësi ukrainas ka thënë se po kryen një sërë ndryshimesh të personelit në qeveri, autoritetet rajonale dhe shërbimet e sigurisë.
Mediat lokale raportuan se largimi i Tymoshenko – i cili mbikëqyri politikën rajonale dhe më parë ka punuar në fushatën zgjedhore të Zelensky mund të jetë pjesë e ndryshimit të presidentit.
Por ristrukturimi vjen në mes të një shtypjeje të korrupsionit në Ukrainë, një nga kërkesat kryesore të BE-së nëse vendi do të avancojë aplikimin e tij për t’u bashkuar me bllokun. Autoritetet i kanë ndaluar të gjithë zyrtarët shtetërorë të largohen nga Ukraina, përveç nëse janë në udhëtime pune të autorizuara.
Të hënën, zëvendësministri i infrastrukturës i Ukrainës, Vasyl Lozinskyi, u shkarkua dhe u arrestua nga policia pasi u akuzua për marrje ryshfeti me vlerë 400,000 dollarë (320,000 £). Ai i ka mohuar akuzat.
Ukraina ka një histori korrupsioni dhe në vitin 2021 Transparency International e ka renditur vendin në 122 nga 180 vende në renditjen e shteteve të korruptuara.
Në një fjalim të dielën, Zelensky premtoi se “nuk do të ketë kthim në atë që ka qenë në të kaluarën, në mënyrën se si jetonin njerëzit e ndryshëm pranë institucioneve shtetërore”.
Dhe David Arakhamia, kreu i partisë së Zelensky, Shërbëtori i Popullit, është zotuar se zyrtarët e korruptuar mund të përballen me burg.
Ministri i Mbrojtjes Oleksii Reznikov është gjithashtu nën kritika kohët e fundit, pas raportimeve të mediave që sugjeronin se ministria e tij nënshkroi një kontratë për të blerë ushqime për ushtrinë me çmime të fryra. Reznikov tha se ato çmime ishin një “gabim teknik”.
Një raport i gazetës ukrainase Ukrainska Pravda sugjeron se krerët e katër administratave rajonale – Sumy, Dnipro, Zaporizhzhia dhe Kherson – mund të jenë të radhës që do të shkojnë pas Timoshenko, për shkak të lidhjeve të tyre me ndihmësin e dorëhequr presidencial./21Media