E vrau dhe ia hodhi trupin në lum, istogasi dënohet me 17 vjet burgim

K.B u dënua me 17 vjet burgim nga Gjykata Themelore në Pejë, pasi u shpall fajtor për vrasjen e A.D. me tetë plumba, në shtator të vitit 2018 në fshatin Istog i Poshtëm.
Sipas aktgjykimit të shpallur, të hënën nga kryetarja e trupit gjykues, gjykatësja Nushe Kuka-Mekaj, dënimi me burgim do të ekzekutohet pas 15 ditësh kur aktgjykimi të bëhet i formës së prerë, raporton “Betimi për Drejtësi”.
Gjykatësja Kuka-Mekaj bëri të ditur se K.B i vazhdohet masa e paraburgimit, kurse pala e dëmtuar u udhëzua në kontest civil.
Sipas aktakuzës së ngritur më 10 tetor 2019, K.B më 12 shtator 2018, rreth orës 20:25 deri më 21:15, në shtëpinë e tij në fshatin Istog i Poshtëm, pikërisht në sallonin e shtëpisë së tij, për shkak të mosmarrëveshjeve të atëçastshme, në mes të pandehurit dhe tani të ndjerit A.D, me dashje e ka privuar nga jeta këtë të fundit.
Sipas aktakuzës, A.D kishte shkuar me veturën e tipit “BMW 120” në shtëpinë e të pandehurit, me qëllim që nga i njëjti të kërkonte një armë automatike-kallashnikov, e cila synohej të përdorej në një gazmend familjar dhe që me të, të festonin në fejesën e kushëririt të tyre.
Në aktakuzë bëhet e ditur se pasi tani i ndjeri shkoi në shtëpinë e të pandehurit, pas mosmarrëveshjeve mes tyre, i pandehuri nga arma automatike e llojit të panjohur shtiu disa herë në drejtim të tani të ndjerit, duke e goditur me tetë predha në pjesë të ndryshme të trupit, ku si pasojë e plagëve vdiq në vendin e ngjarjes.
Sipas aktakuzës, më pas K.B me veturën e tani të ndjerit, e mori trupin e tij e dërgon te lumi i Shushicës, ku e hodhi atë nga ura, e pastaj me veturë vazhdoi në drejtim të Mitrovicës, ku në lagjen “Bair” e braktisi veturën, derisa kufoma ishte gjendur rreth orës 15:05, në vendin e lartcekur.
Me këtë, ai bëhet e ditur se ka kryer veprën penale të “Vrasjes”, nga neni 178 i Kodit Penal, i cili parasheh dënimin me jo më pak se pesë vjet burgim./BetimipërDrejtësi