Gjukanoviq për Ballkanin e Hapur: Kemi nevojë për BE-në, jo për alternativa

Presidenti i Malit të Zi, Milo Gjukanoviq, ka përsëritur qëndrimin e tij për nismën “Ballkani i Hapur”.
Gjukanoviq, pas takimit që pati të martën me presidentin e Gjermanisë, Frank-Walter Steinmeier, tha se Malit të Zi dhe shteteve të rajonit u duhet anëtarësimi në Bashkimin Evropian e jo alternativat, siç e quajti ai “Ballkanin e Hapur”.
“Nuk mendoj se kemi nevojë për alternativë, kemi nevojë për anëtarësim. Prandaj mendoj se është krejtësisht e natyrshme që ne të vazhdojmë procesin e negociatave me BE-në me shpejtësi të plotë. Unë besoj se kjo Qeveri do ta bëjë këtë. Besoj se së shpejti do të zhbllokojmë procesin e negociatave në fushën e sundimit të ligjit dhe kështu do të fillojmë mbylljen e kapitujve të negociatave dhe besoj se me pjesëmarrjen e plotë në Procesin e Berlinit do t’i japim vetes një moment të mirë dhe se Mali i Zi do të vlerësojë avantazhin që e ndërtuam në periudhën paraprake dhe u bëmë anëtari i parë i ardhshëm i BE-së”, theksoi Gjukanoviq.
Duke iu përgjigjur pyetjes se a shqetësohej për reagimet e kryeministrit Dritan Abazoviq për mbështetjen e projektit “Ballkani i Hapur” Gjukanoviq tha se nuk shqetësohet dhe se nuk janë as të reja e as të panjohura për të, transmeton rtv21.tv.
“Ne kemi qëndrime të ndryshme për këtë iniciativë. Unë kam dëgjuar shumë herë prej tij se si pjesë e mbështetjes së tij për të gjitha nismat rajonale, ai gjithashtu e mbështet këtë. Gjithashtu, disa herë e kam deklaruar publikisht se nuk mendoj se kjo është një nismë optimale. Më tepër e shoh atë si një lloj kopje të Procesit të Berlinit. Replika është shumë e dukshme në favor të Procesit të Berlinit. Procesi i Berlinit bashkon të gjitha vendet e Ballkanit Perëndimor dhe Ballkani i Hapur bashkon vetëm tre vende. Procesi i Berlinit bazohet në standardet evropiane dhe është plotësues me procesin e anëtarësimit. Pra, gjithçka që bëjmë përmes procesit të Berlinit, po punojmë që të arrijmë standardin që do të na kualifikojë për anëtarësim në finale”, tha Gjukanoviq.
Presidenti i Malit të Zi, Milo Gjukanoviq nesër do të qëndrojë për vizitë zyrtare në Kosovë me ftesë të presidentes, Vjosa Osmani./21Media