Hamza viziton rezervuarët e ujësjellësit “Mitrovica” pas incidentit në Veri

Kryetari i Mitorvicës së Jugut dhe kandidati për kryeministër i PDK-së, Bedri Hamza, ka vizituar sot në mëngjes rezervuarët e kompanisë rajonale të ujësjellsit “Mitrovica” për të parë gjendjen e tyre.

Hamza ka falendëruar të gjithë ata që po angazhohen për të sanuar dëmin e shkaktuar në kanalin e Ibër-Lepencit, mediat për raportimin korrekt dhe aleatët ndërkombëtarë për reagimin e tyre të shpejt për ndodhinë në veri.

“Këtë paradite isha te rezervuarët e Kompanisë Rajonale të Ujësjellësit “Mitrovica” për ta parë nga afër gjendjen e tyre. I falënderoj të gjithë zyrtarët që po angazhohen në vendngjarje për sanimin e dëmit, qytetarët për durimin, mirëkuptimin e maturinë dhe mediat për raportimin korrekt. U jam mirënjohës të gjithë partnerëve ndërkombëtarë për reagimet e tyre të shpejta dhe të vendosura për zhvillimet në veriun e vendit.
Siguria e qytetarëve, siguria e infrastrukturës publike, ruajtja e rendit dhe rikthimi i normalitetit duhet të jenë prioritete absolute për të gjithë ne”, ka shkruar Hamza në Facebook”

Të premten ka ndodhur një shpërthim në rrjetin e ujësjellësit të Ibër-Lepencit në fshatin Varagë të Zubin-Potokut – më pak se 24 orë pas sulmit me granatë dore në ndërtesën e Komunës në Zveçan – duke shkaktuar dëme të konsiderueshme në kanalin e ujit të Ibër-Lepencit, duke rrezikuar kështu furnizimin me ujë dhe rrymë në vend.

Autoritetet qendrore të Kosovës, për sulmin që kanë cilësuar terrorist, e bëjnë përgjegjëse Serbinë. Sulmet janë dënuar edhe nga SHBA-ja e BE-ja./21Media