Haradinaj kërkon ndriçimin e rastit të të miturës
Mbledh përfaqësuesit e rendit dhe sigurisë
Kryeministri i Kosovës, Ramush Haradinaj ka kërkuar nga institucionet përgjegjëse që të ndriçojnë rastin e të miturës nga Drenasi, e cila është viktimë e përdhunimit që dyshohet të jetë kryer nga një mësimdhënës dhe një polic. Lidhur me këtë Haradinaj ka pritur sot në takim ministrin e Brendshëm Ekrem Mustafa, Ministrin e Arsimit, Shyqiri Bytyqi, Drejtorin e përgjithshëm të Policisë Rashit Qalaj, Kryeshefen e Inspektoratit Policor Miradie Kelmendi dhe Kryeinspektorin e Arsimit Defrim Gashi.
“Kërkova që të ndërmerren të gjitha veprimet, bazuar në ligjet e Kosovës, për ta zbardhur të vërtetën dhe për t’i nxjerrë para drejtësisë, të gjithë ata që kanë kryer vepër të jashtëligjshme në rastin e të miturës nga Drenasi.”, ka shkruar Haradinaj në Facebook.
Më tej kreu i ekzekutivit ka kërkuar që ky rast të trajtohet në kohë dhe me profesionalizëm nga të gjitha institucionet e vendit.
“Institucionet e vendit, Prokuroria dhe Gjykata, duhet të dëshmojnë fuqinë e vet në zbatim të ligjit. Rasti i abuzimit seksual të të miturës nga Drenasi, duhet të trajtohet në kohë dhe me profesionalizëm nga të gjitha institucionet e vendit. Njëkohësisht, kërkoj nga të gjitha mekanizmat institucional dhe shoqëror, që të bashkërendojnë politikat dhe aktivitetet, me qëllim të parandalimit të rasteve të tilla në të ardhmen.”, ka bërë të ditur Haradinaj.
“
Të martën në media u raportua se e mitura nga Drenasi ishte keqpërdorur seksualisht nga profesori SH. XH dhe nga hetuesi policor V. V, ky i fundit e kishte lënë shtatzënë të miturën e pastaj e kishte detyruar që të abortojë.
Pas raportimit të ngjarjes ishte arrestuar zyrtari policior me inicialet V.V, ku dje i njëjti ka dalë para gjykatës. Gjykata Themelore në Prishtinë, Departamenti për Krime të Rënda ka caktuar masën e paraburgimit prej një muaji për policin e dyshuar. Gjithashtu dje janë arrestuar edhe mësimdhënësi dhe gjinekologu, që dyshohet se janë të përfshirë në këtë rast.
Me moton “PRO Mësimit, JO Përdhunimit” po mbahet protesta e organizuar nga Shoqëria Civile e Drenasit. Fillimisht protestuesit po qëndrojnë para gjimnazit “Gjergj Kastriot Skëndërbeu”, e protesta do të vazhdojë te Stacioni i Policisë në Drenas./21Media