Haradinaj: Krenar që vendosa një gur në themelin e Ushtrisë së Kosovës

Kryetari i Aleancës për Ardhmërisë e Kosovës (AAK), Ramush Haradinaj në përvjetorin e katërt të Ushtrisë së Kosovës ka thënë se ndihet krenar që ka vendosur një gur në themelin e kësaj ushtrie.
Ai përmes një postimi në “Facebook” e ka rikthyer edhe fjalimin e tij.
“Kosovë, urime katër vjetori i Ushtrisë. Krenar që pata mundësinë ta vendos një gur në themelin e Ushtrisë së Kosovës! Në katër vjetorin e themelimit të saj, po e rikthej në vëmendjen tuaj një fjalë timen, nga zemra”, thuhet në postimin e Haradinajt.

Parlamenti i Kosovës me 106 vota pro dhe një abstenim, më 14 dhjetor 2018 miratoi tri ligjet që e ndryshojnë mandatin e Forcës së Sigurisë së Kosovës (FSK) në ushtri të Kosovës, por pa iu ndërruar emri.
Ligjet që u miratuan ishin Projektligji për Ministrinë e Mbrojtjes, Projektligji për Forcën e Sigurisë së Kosovës dhe Projektligji për shërbim në Forcën e Sigurisë së Kosovës. Amendamentet e ligjeve u votuan një nga një.
Deputetët serbë në Parlamentin e Kosovës nuk morën pjesë në seancë. Ata e kanë kundërshtuar formimin e Ushtrisë së Kosovës.
Udhëheqësit e institucioneve të Kosovës, votimin dhe miratimin e ligjeve për ushtrinë e cilësuan si “një ditë historike dhe një nga vendimet më të rëndësishme që nga shpallja e pavarësisë së Kosovës në vitin 2008”./21Media