Hoti me kritika ndaj Pecit, “bujqësia 2021-2024: Dështim total”

Deputeti i LDK-së Abdullah Hoti, e ka kritikuar Ministrin e Bujqësisë, Faton Pecin pasi që sipas tij bujqësia ka një dështim total në vitet 2021-2024.

Hoti përmes një postimi në Facebook ka parashtuar pyetje këtij dikasteri se pse ka rënie në sipërfaqet e mbjella dhe pse ka rënie numri i kafshëve, shpezëve e bletëve.

Gjithashtu, ai nuk ka la pa përmendur edhe investimet në teknologjinë e ruajtjes dhe përpunimit të ushqimeve.

“Dështimet në bujqësi në tri tabela: – TABELA 1: Gjatë mandatit 2021-2024, janë shpenzuar 252.7 mil euro në subvencione bujqësore (për 2024 janë në shpenzim e sipër).

– TABELA 2: Në 2023, krahasuar me 2020, numri i kafshëve, shpezëve dhe bletëve, si dhe i sipërfaqeve të kultivuara ka rënë, me përjashtim të numrit të shpezëve dhe sipërfaqeve me pemishte.

– TABELA 3: – Në 2023, krahasuar me 2019, importet e mallrave kryesore ushqimore janë rritur për 72% (apo për 455 mil euro): për kafshë të gjalla 339%, për mish 43%, bylmet e vezë 61%, perime 78%, e kështu me radhë.

Edhe pas eliminimit të efektit të inflacionit në vlerën e importeve, sërish rritja mbetet e madhe. (Bazë krahasuese është marrë viti 2019 pasi në vitin 2020 ka pasur kufizime në tregti shkaku i pandemisë.) Pyetjet legjitime janë këto: 1. Përse ka rënie në sipërfaqet e mbjella? 2. Përse ka rënë numri i kafshëve, shpezëve e bletëve? 3. Çfarë po ndodh me prodhimin vendor – përse po importojmë më shumë ushqime kur kemi dukshëm më pak qytetarë rezidentë? 4. Cili është ndikimi i 252.7 mil euro të shpenzuara në subvencione? E vërteta është se bujqësia nuk po zhvillohet. Nuk ka investime në rritjen e tokave bujqësore nën ujitje. Nuk ka kreditim me kushte të volitshme për investime bujqësore. Nuk ka investime në teknologjinë e ruajtjes dhe përpunimit të ushqimeve”, u shpreh Hoti. /21Media