Inteligjenca artificiale “mund të vrasë njerëz brenda dy vitesh”, thotë këshilltari i kryeministrit britanik
Inteligjenca artificiale (AI) mund të bëhet mjaft e fuqishme për të “vrarë shumë njerëz” në vetëm dy vjet, sipas Matt Clifford, këshilltar për teknologjinë i kryeministrit të Britanisë, Rishi Sunak.
Clifford tha se edhe rreziqet afatshkurtra ishin “shumë të frikshme”, me AI që kishte potencialin për të krijuar armë kibernetike dhe biologjike që mund të shkaktonin shumë vdekje.
Këshilltari tha se nëse prodhuesit e AI nuk rregullohen në një shkallë globale, atëherë mund të ketë sisteme “shumë të fuqishme” që njerëzit mund të luftojnë për t’i kontrolluar.
“Rreziqet afatshkurtër janë në fakt shumë të frikshme. Ju mund të përdorni AI sot për të krijuar receta të reja për armë biologjike ose për të nisur sulme kibernetike në shkallë të gjerë. Këto janë gjëra të këqija. Lloji i rrezikut ekzistencial për të cilin unë mendoj se po flisnin shkruesit e letrave ka të bëjë me atë që ndodh pasi të krijojmë në mënyrë efektive një specie të re, një inteligjencë që është më e madhe se njerëzit”, tha Clifford.
I pyetur se sa përqind shanse do të jepte që njerëzimi mund të zhdukej nga AI, Clifford tha: “Unë mendoj se nuk janë zero”.
Paralajmërimet e Clifford erdhën pas një letre të mbështetur nga dhjetëra ekspertë të lartë – përfshirë shumë nga pionierët e AI – të cilët paralajmëruan se rreziqet e teknologjisë duhet të trajtohen me të njëjtën urgjencë si pandemitë ose lufta bërthamore, shkruan Independent, përcjell rtv21.tv.
Shefat e lartë në Google DeepMind dhe Anthropic nënshkruan letrën së bashku me të ashtuquajturin “kumbari i AI”, Geoffrey Hinton. Hinton dha dorëheqjen nga puna e tij në Google në fillim të këtij muaji – duke paralajmëruar se në duart e gabuara, AI mund të shënojë fundin e njerëzimit.
Këto deklarata vijnë në kohën kur Sunak po viziton SHBA-në, në përpjekje që të bindë presidentin Joe Biden për “planin e tij të madh” që Mbretëria e Bashkuar të jetë në qendër të rregullimit ndërkombëtar të AI-së.
Sunak dëshiron që Britania të jetë një mbikëqyrës për inteligjencën artificiale të ngjashme me Agjencinë Ndërkombëtare të Energjisë Atomike, dhe gjithashtu do të propozojë një organ të ri ndërkombëtar kërkimor.
Aplikacionet e AI janë bërë virale në internet, me përdoruesit që postojnë imazhe të rreme të të famshmëve dhe politikanëve, dhe studentë që përdorin ChatGPT dhe “modele të tjera të mësimit të gjuhës” për të gjeneruar ese të nivelit universitar.
Por AI mund të kryejë gjithashtu detyra shpëtimi, të tilla si algoritmet që analizojnë imazhet mjekësore si rrezet X, skanimet dhe ultratingujt, duke ndihmuar mjekët të identifikojnë dhe diagnostikojnë sëmundje të tilla si kanceri dhe sëmundjet e zemrës më saktë dhe shpejt. /21Media
Dëshiron ta dëgjosh këtë lajm me zë?