Izraeli dhe Irani zgjerojnë sulmet në ditën e katërt të konfliktit
(Lajm i përditësuar)
- Sulmet nga Izraeli dhe Irani vazhdojnë ndërsa konflikti midis dy vendeve hyn në ditën e katërt
-
Pesë persona janë vrarë në sulmet ajrore të Iranit në Izraelin qendror gjatë natës dhe dhjetëra të tjerë janë plagosur, sipas shërbimit kombëtar të emergjencave të Izraelit.
-
Të dielën, sulmet ajrore izraelite vranë shefin e njësisë së inteligjencës së forcave të armatosura të Iranit.
-
Kjo vjen pasi Izraeli sulmoi Iranin herët të premten, duke goditur objekte bërthamore, vende ushtarake dhe zona të populluara. Irani është kundërpërgjigjur me dronë dhe raketa balistike.
-
Presidenti i SHBA-së, Donald Trump, thotë se të dyja palët duhet të arrijnë një marrëveshje , duke shtuar se po zhvillohen telefonata dhe takime ndërsa përshkallëzimi hyn në ditën e katërt, por Irani thotë se nuk do të negociojë një armëpushim ndërsa është nën sulm.
-
Kryeministri izraelit Benjamin Netanyahu thotë se “çështja këtu nuk është deeskalimi”, por ndalimi i Iranit nga zhvillimi i aftësive të tij bërthamore.
-
Ministria e Shëndetësisë e Iranit raporton se të paktën 224 persona janë vrarë në sulmet izraelite që nga e premtja.
Lideri i opozitës izraelite bën thirrje për përfshirje të SHBA-së në konfliktin me Iranin
Udhëheqësi i opozitës izraelite, Yair Lapid, i ka kërkuar Shteteve të Bashkuara të përfshihen në luftën në Iran, duke e ndihmuar Izraelin të godasë vende të fortifikuara rëndë, siç është impianti i pasurimit bërthamor në Fordow.
Lapid, i cili kryeson partinë Yesh Atid, tha se vendimi i takon Presidentit të SHBA-së Donald Trump, por shtoi: “Ky është një kërcënim për të gjithë globin.”, raporton CNN përcjell portali rtv21.tv
Lapid tha se Izraeli “do të duhet të vazhdojë derisa të jemi të sigurt se Irani nuk ka aftësinë të bëhet një kërcënim bërthamor për popullin e Izraelit”.
Të dielën, CNN raportoi se Trump hodhi poshtë një plan izraelit për të vrarë udhëheqësin suprem të Iranit, Ajatollah Ali Khamenei.
Izraeli “kontrollon qiellin mbi Teheranin”, thotë Netanyahu
Kryeministri izraelit Benjamin Netanyahu ka thënë se Forcat Ajrore të Izraelit “kontrollojnë qiellin mbi Teheranin”.
“Ne u themi qytetarëve të Teheranit: ‘Evakuohuni’ – dhe ne veprojmë”, shtoi ai.
Irani raporton 224 të vdekur
Sulmet izraelite ndaj Iranit kanë shkaktuar 224 viktima që nga fillimi i luftimeve të premten, ka deklaruar zëdhënësi i Ministrisë së Shëndetësisë së Iranit, Hossein Kermanpour.
Sipas ANSA, Presidenti i Iranit, Masoud Pezeshkian, theksoi sërish se “Ne kemi të drejtën për energji bërthamore paqësore, askush nuk mund t’ia mohojë këtë të drejtë kombit iranian”, në kontekstin e konfliktit të vazhdueshëm me Izraelin.
“Sipas politikave të udhëheqësit të revolucionit islamik, Irani nuk synon armë bërthamore”, tha presidenti iranian, sipas raportimeve të PressTV, duke iu referuar fetvasë së Liderit Suprem Ali Khamenei, e cila në vitin 2003 ndaloi përdorimin dhe prodhimin e armëve të shkatërrimit në masë.
Tetë persona u vranë gjatë natës në Izrael, thonë zyrtarët
Izraeli thotë se tetë persona u vranë gjatë natës nga sulmet iraniane në lagjet e banimit në Tel Aviv, Haifa dhe qytete të tjera.
Numri i përgjithshëm i personave të vrarë që nga e premtja është 24, sipas zyrës së kryeministrit izraelit dhe medias izraelite, raporton BBC, përcjell portali rtv21.tv
Zyrtarët e shëndetësisë thonë se gati 300 persona janë shtruar në spital.
Irani thotë se më shumë se 200 njerëz janë vrarë atje që kur Izraeli filloi konfliktin të premten
Zhvillimet në Lindjen e Mesme, BE-ja thërret takim urgjent të ministrave të Jashtëm
Përfaqësuesja e Lartë e Bashkimit Evropian për Politikën e Jashtme, Kaja Kallas, ka thirrur një videokonferencë urgjente të ministrave të jashtëm të BE-së për të martën.
Takimi është thirrur për të diskutuar mbi zhvillimet në Lindjen e Mesme, pas sulmeve mes Izraelit dhe Iranit, sipas njoftimit të një zëdhënësi të BE-së, shkruan CNN.
“Duke pasur parasysh seriozitetin e situatës në Lindjen e Mesme, përfaqësuesja e lartë Kaja Kallas ka thirrur një takim të Ministrave të Jashtëm të BE-së nëpërmjet videokonferencës për të martën”, tha zëdhënësi.
Takimi do të ofrojë një mundësi për të shkëmbyer pikëpamje, për të koordinuar qasjen diplomatike ndaj Tel Avivit dhe Teheranit, si dhe për të hartuar hapat e mundshëm të mëtejshëm.
Irani dhe Izraeli janë armiq rajonalë për dekada me radhë.
Në qendër të sulmeve të Izraelit ndaj Iranit qëndron programi bërthamor i diskutueshëm i Teheranit.
Irani gjithmonë ka pohuar se programi i tij bërthamor është paqësor. Megjithatë, Irani ka pasuruar sasi gjithnjë e më të mëdha uraniumi në nivele afër atyre për armë dhe besohet se mund të zhvillojë disa armë brenda muajsh nëse dëshiron ta bëjë.
Agjencia Ndërkombëtare për Energjinë Atomike e OKB-së e dënoi Iranin javën e kaluar për mospërmbushjen e detyrimeve të tij.
Banorët e Teheranit do të ‘paguajnë çmimin’, thotë ministri izraelit i mbrojtjes
Ministri i mbrojtjes i Izraelit ka paralajmëruar se banorët e Teheranit do të “paguajnë çmimin” për sulmet iraniane ndaj qytetarëve izraelitë, pasi sulmet gjatë natës vranë pesë persona dhe plagosën dhjetëra të tjerë.
Israel Katz akuzoi udhëheqësin e Iranit, Ali Khamenei, se ka synuar qëllimisht zonat civile “për të penguar IDF-në të vazhdojë sulmin që po i shkatërron kapacitetet e tij”, raporton BBC, përcjell portali rtv21.tv
Katz e quajti Khamenein një “vrasës frikacak” dhe një “diktator mburravec”.
Ai tha se Izraeli do të hakmerret “së shpejti”./21Media