Jasharaj tha se të shtunën nuk do të ketë mësim

Kryetari i SBAShK-ut, Rrahman Jasharaj sot deklaroi se kompensimi për orët e humbura gjatë grevës nuk do të bëhet këtë të shtunë, siç ka thënë ministrja e arsimit, Arbërie Nagavci.
Në një konferencë për media, Jasharaj bëri të ditur se do të zbatohet kontrata kolektive e nënshkruar mes SBAShK-ut dhe MAShT-it, në këtë formë sipas tij nuk do të kompensohen orët e humbura.
Ai tha se ministrja e arsimit, Arbërie Nagavci në vend të konsultimeve edhe me palët tjera mori vendim të një anshëm dhe sipas tij, SBAShK-u e ka për obligim të zbatoj kontratën kolektive.
Më tej, Jasharaj tha se presin ftesë për takim nga ministrja e arsimit, Arbërie Nagavci nëse do të ketë ndonjë marrëveshje të veçantë mes dy palëve, ndryshe sipas tij nëse nuk ka ftesë për takime, SBAShK-u do të vazhdojë të zbatojë atë çfarë thuhet në kontratë. Derisa ka shtuar se Nagavci nuk e ka respektuar kontratën kolektive ku thuhet se orët e humbura nuk do të respektohen.
Ai tha se qeveria duhet t’a ndalë shkeljen e ligjeve dhe goditjet ndaj SBAShK-ut dhe të ulet të dialogojë me SBAShK-un.
Ndryshe, Ministrja e Arsimit, Shkencës, Teknologjisë dhe Inovacionit, Arbërie Nagavci, dje i ka kthyer përgjigje kërkesës së Kryetarëve të Komunave lidhur me formën dhe mënyrën e kompensimit të orëve mësimore të humbura gjatë ditëve të grevës së punonjësve arsimor në Republikën e Kosovës. Sipas saj, mësimi vazhdon të mbahet sipas kalendarit të MASHTI-it të cilin e kanë publikuar ditë më parë.