Katër vjet pa Adem Demaçin

Sot bëhen katër vjet që kur në moshën 82-vjeçare ka ndërruar jetë veprimtari i çështjes kombëtare, Adem Demaçi, i njohur si Mandela i Kosovës.
Me prejardhje nga Lupqi i Podujevës, Demaçi është lindur më 26 shkurt 1936 në Prishtinë. Ka qenë veprimtar për kauzën kombëtare në kohën e Jugosllavisë dhe ka luftuar për barazinë e Kosovës me republikat e tjera.
Për angazhimin e tij politik, Adem Demaçi ka vuajtur 28 vjet me radhë në burgjet e Jugosllavisë. Pasi është liruar, ai menjëherë ka vazhduar aktivitetin e tij politik. Ai është quajtur edhe Nelson Mandela i Evropës.
Adem Demaçi ka udhëhequr Këshillin për të Drejtat dhe Liritë e Njeriut (KMDLNJ) nga viti 1990-1995. Në vitin 1991 është nderuar nga Parlamenti Evropian me Çmimin Saharov.
Gjatë periudhës 1998-1999, kur janë mbajtur takimet në Rambouillet për të ardhmen e Kosovës, ai ka qenë zëdhënës politik i UÇK-së. Adem Demaçi ka qenë njëkohësisht kryetar i Lidhjes së Shkrimtarëve të Kosovës (2005-2007).
Sot, njerëzit e rezistencës kombëtare identifikohen me emrin e Adem Demaçit, sepse ai me punën dhe me veprën e tij, është bërë simbol i unifikimit për ruajtjen e kombit shqiptar, mbi pesë dekada.
Adem Demaçi me jetën dhe veprën e tij, është shndërruar në një personalitet të përmasave të historisë së përgjithshme njerëzore, ku bën pjesë edhe historia jonë kombëtare. Ai ka shkruar romanin “Gjarpinjtë e Gjakut”, i cili është ndaluar nga regjimi ish-komunist. Ai e ka parë dritën vetëm pas viteve të nëntëdhjeta.
Pasditen e 26 korrikut të vitit 2018, Adem Demaçi ka ndërruar jetë. Në nderim të tij janë organizuar shumë aktivitete shtetërore dhe janë mbajtur tri ditë zie në Kosovë.