KESCO nuk e zbaton vendimin e ZRRE, thotë se ka paqartësi dhe kërkon sqarime

Kompania kosovare për Furnizim me Energji Elektrike, KESCO ka kërkuar sqarime nga Zyra e Rregullatorit për Energji se si të operojnë pas vendimit të Gjykatës që ekzekutimi i vendimit të ZRRE-së për shtrenjtimin e rrymës të shtyhet.
“KESCO njofton konsumatorët se ka pranuar të premtën në mbrëmje nga ZRRE vendimin për shtyrjen e ekzekutimit të vendimit të ZRRE-së për Tarifat e Energjisë Elektrike të marrë më 8 shkurt 2022. Por, ky vendim që është dërguar nga rregullatori ka paqartësi se si duhet të veprojmë ne si operatorë. Për të shmangur keqkuptimet të cilat potencialisht mund të prekin konsumatorët, ne kemi kërkuar sqarime nga ZRRE”, thuhet në njoftim.
KESCO tha se dëshirojnë t’i sigurojnë konsumatorët që nuk do të dëmtohen në asnjë rrethanë.
“Çdo proces, i cili do të bazohet tërësisht në udhëzimet e ZRRE-së, do të jetë transparent dhe do t’iu shpjegohet në detaje konsumatorëve. KESCO ka qenë gjithmonë në anën e konsumatorëve. Kjo është dëshmuar në praktikë edhe kohët e fundit, kur vullnetarisht kishim zgjeruar pragun e shpenzimeve, në mënyrë që sa më pak konsumatorë të prekeshin nga tarifat e reja gjatë muajit shkurt, duke mbuluar vet shpenzimet mbi prag për një pjesë të tyre”, thuhet në njoftim./21Media