Kompania “Pastrimi” bën apel për pagimin e faturave

Kompania Regjionale e Mbeturinave “Pastrimi” ka bërë apel te qytetarët për t’i paguar faturat.

Bëhet e ditur se qytetarët faturimin dhe pagesat për shërbimet e menaxhimit të mbeturinave duhet ti kryejnë në pikat zyrtarë të Kompanisë.

“Dëshirojmë të theksojmë se pezullimi i ndryshimit të rregullores për mbeturinat, i miratuar nga Kuvendi Komunal, nuk mund të bëhet me vendim personal të kryetarit të Komunës, Përparim Rama. Një rekomandim i Zyrës Ligjore të Komunës nuk ka kompetencë ekzekutive mbi vendimet e Kuvendit Komunal, prandaj çdo veprim në kundërshtim me këtë rregullore është i paligjshëm”, theksohet në njoftimin e kompanisë.

Tutje, “Pastrimi” apelon te qytetarët të mos bien pre e keqinformimit dhe të kryejnë pagesat e tyre.

“Pagesa e faturave është thelbësore për përmirësimin e shërbimit, garantimin e pagave të punëtorëve dhe krijimin e një mjedisi më të pastër për të gjithë. Mos lejoni që keqmenaxhimi dhe interesat financiare të cenojnë cilësinë e shërbimit publik! Paguani faturën tuaj në “Pastrimi” dhe kontribuoni në një Prishtinë më të pastër dhe më të rregulluar”, thuhet në njoftim.