Konkursi për dy gjyqtarët e Kushtetueses do të përsëritet

Edhe raundi i tretë i votimit në seancën e sotme të Kuvendit të Kosovës nuk përcaktoi përfundimisht se cilët do të jenë dy gjyqtarët e Gjykatës Kushtetueses.
Në këtë raund votimi kandidatë ishin Etrur Maloku, Bardh Bokshi dhe Hilmi Jashari.
Në procesin e votimit morën pjesë 79 deputetë, prej tyre 5 vota ishin të pavlefshme.
Etrur Maloku mori 43 vota, Bardh Bokshi 41 vota dhe Hilmi Jashari 18 vota, duke mos arritur asnjëri prej tyre të marrë votat e mjaftueshme.
Për t’u zgjedhur, kandidati duhet të marrë dy të tretat e votave të deputetëve të pranishëm në seancë dhe që votojnë.
Kryetari i Kuvendit të Kosovës, Glauk Konjufca, tha se pasi asnjëri prej kandidatëve nuk ka marrë votat e mjaftueshme, atëherë do të përsëritet konkursi për të dy këto pozita.
Ndryshe, seanca plenare e Kuvendit të Kosovës nuk do të vazhdojë sot. Konjufca tha se për vazhdimin e seancës do të përcaktohet në një mbledhje të kryesisë së Kuvendit që do të mbahet paraprakisht.