Koreja e Veriut lëshon raketë balistike ndërkontinentale drejt Japonisë

Koreja e Veriut lëshoi një raketë balistike në brigjet e saj lindore drejt Japonisë, në një veprim që pasoi kërcënimet për hakmarrje për fluturimet e supozuara të avionëve spiun amerikan.

Raketa fluturoi rreth 1,000 km përpara se të përplasej në ujë, tha ushtria e Koresë së Jugut. Sekretari kryesor i kabinetit të Japonisë tha se raketa u rrëzua rreth 250 km në perëndim të ishullit Okushiri në prefekturën më veriore të Japonisë Hokkaido, pas një fluturimi që zgjati 74 minuta që arriti një lartësi prej më shumë se 6,000 km.

Kjo ndodhi teksa gjenerali më i lartë amerikan u takua me homologët e tij koreano-jugor dhe japonezë për një takim të rrallë trepalësh në Hawaii. Lëshimi i Koresë së Veriut ndodhi në përfundim të takimit, i cili ishte planifikuar prej kohësh.

Uashingtoni ka ushtruar presion ndaj fqinjëve të shqetësuar që të punojnë më ngushtë për të kundërshtuar më mirë kërcënimet në rritje nga Kina dhe Koreja e Veriut, shkruan Guardian, përcjell rtv21.tv.

Disa ekspertë thanë se Koreja e Veriut ka të ngjarë të ketë testuar Hwasong-18 ICBM, një lloj arme me lëndë djegëse të ngurtë që është më e vështirë për t’u zbuluar dhe kapur se sa ICBM-të e tjera me karburant të lëngshëm të Veriut. Sundimtari i Koresë së Veriut, Kim Jong-un, më parë e quajti Hwasong-18 armën e tij më të fuqishme bërthamore.

Nisja është e 12-ta e Koresë së Veriut këtë vit. Në prill, regjimi testoi raketën e tij të parë balistike ndërkontinentale me lëndë djegëse të ngurtë dhe në fund të majit kreu një përpjekje të dështuar për të lëshuar atë që e quajti satelitin e tij të parë spiun në një mjet të ri lëshues.

Nisja e fundit vjen pasi Koreja e Veriut bëri ankesa të ashpra mbi aktivitetet ushtarake amerikane, duke akuzuar avionët spiun amerikan për shkelje të hapësirës ajrore në zonat e saj ekonomike dhe duke dënuar një vizitë të fundit në Korenë e Jugut nga një nëndetëse amerikane me raketa lundrimi me energji bërthamore.

Kim Yo-jong, motra me ndikim e Kim Jong-un, kërcënoi të hënën me pasoja “tronditëse” mbi aktivitetin e zbulimit të SHBA-së.

SHBA dhe Koreja e Jugut hodhën poshtë akuzat e Veriut dhe kërkuan që të shteti diktator të përmbahet nga çdo akt apo retorikë që rrit tensionet. /21Media

NDIQNI PJESËT MË INTERESANTE TË PROGRAMIT TË RTV21, DUKE BËRË LIKE KËTË FAQE – 21 MEDIA